Musicasturiana.com inclúi nuna playlist tol catálogu qu’alministra nes plataformes dixitales

En branu de 2017 Musicasturiana.com entamó’l so llabor de dixitalizar el catálogu d’artistes y discográfiques del país que tuvieren interés nello. Dempués de cinco años, son más de 330 les referencies distribuyíes en plataformes dixitales pa que se puean sentir online dende cualquier país del mundu. Agora, Musicasturiana.com amplía la so playlist Asturies: Nuevo en Spotify, na qu’añade un cantar de toles referencies alministraes en formatu dixital, ordenaos cronolóxicamente.

Son 335 cantares y cuasi 21 hores de música que suponen una muestra bien bayurosa na que se fai un repasu a la música asturiana de los últimos 40 años. Da fechu, la llista va dende l’añu 1983, col primer discu de Trasgu, hasta lo último de Misiva, rozando’l 2023. Ente medies, una montonera de discos d’estramaos estilos, con folk, rock, tradicional, rap, punk, tonada, ellectrónica, hiphop etc.

Dexa un comentariu

X