Sin Emu llancen el so segundu trabayu, ‘Fueu a too’
La banda de punk de les cuenques mineres asoleyó ayeri un EP nuevu tituláu Fueu a too. Cinco temes conformen esti segundu trabayu del grupu, dempués del so primer discu, llanzáu en 2019 y col nome “Última Guerra”. L’EP nuevu tien portada de Xabi Gurrera de Revolta Gráfica, y grabación y producción de Neftali Vázquez feches nos Breakdown Studios. Pue sentise yá en YouTube, y nel Facebook del grupu tan disponibles enllaces pa la so descarga, con llicencia Creative Commons.
“La de la Felguera”, “La última barricada”, “El sol de los muertos”, “Beber y surniar” y “No me importa tu opinión” son los nuevos títulos de Sin Emu, con unes lletres n’asturianu y castellanu que falen de llucha, de decadencia y de ruina, cantaes por unes voces enérxiques, enllenes de rabia, que-yos imprimen el calter que yá reflexa’l títulu.
