Yá que tolos años acutamos un fin de selmana de setiembre pa dedicalo a la tradición del vigulín n’Asturies gracies a les Xornaes del Vigulín de Piloña, parez apropiáu tornar a la música de DRD ya esfrutala una vegada más col entamu d’esti mes, pues nella atopamos una de les grandes referencies pa los vigulineros ya vigulineres de la música asturiana. El grupu, formáu por Dolfu R. Fernández al vigulín y voz, Rubén Bada a les cuerdes y vigulín, ya Diego Pangua a la xiblata, asoleyó dos álbumes, DRD ya Namái, dambos interesantísimos pa toos ya toes les interesaes en deprender l’estilu ya’l repertoriu d’equí.
Esti 2025, l’álbum Namái, editáu por FonoAstur, cumple 20 años publicáu, y ta mui lloñe d’escaecese, yá que sigue tando presente nel imaxinariu musical de los participantes del folk asturianu, que tovía lu sienten, lu deprenden y lu recomienden, sobre manera pa tocalo nes sesiones. Vamos celebrar esta ventena percorriendo la so música ya‘l so valor.
Nes 14 pistes que formen Namái, alcontramos una rica muestra de repertoriu tradicional asturianu, arregláu con munchu gustu ya bien desplicáu ya citáu nel llibretu del discu, pero tamién composiciones nueves basaes nesta tradición, munches de que yá tán asimilaes dientro‘l repertoriu popular del folk asturianu. Destaca pola so variedá, yá qu’hai temes mesmo cantaos como instrumentales, y toos ellos con tipoloxíes de repertoriu ya instrumentación mui estremaes dientro de les posibilidaes del tríu. Pa faceles, collaboraron con DRD los músicos Jarlath Henderson cola gaita irlandesa nes pistes ‘Poro’, ‘Dafechu’ y ‘Aina’; Sergio Rodríguez (tamién ye’l técnicu de la producción xunto a Bada) col baxu en ‘Axaxi’; ya Fernando Álvarez-Balbuena faciendo les lletres en ‘Mañena’, ‘Abeyaná’ ya ‘Axaxi’.
Ye un gustu atopar música na que s’apuren d’esta manera los recursos que tienen pa ufrir nos instrumentos, y nesti casu los trés integrantes de DRD amuesen ganase’l reconocimientu musical col que cunten na actualidá. La suya ye una música tanto pa xente interesao na xiblata, como na guitarra o nel bouzouki, pero yá qu’esti mes de setiembre ta dedicáu al vigulín, vamos destacar l’habilidá de Dolfu R. Fernández ya Rubén Bada pa interpretar ya iguar con esti instrumentu.
Nes pistes d’esti trabayu alcuéntrense dellos exemplos de vigulín, predominando‘l vigulín estándar, pero apaeciendo tamién el vigulín d’ocho cuerdes ya’l vigulín octaváu, dambos a manes de Dolfu R. Fernández. Ye destacable´l xuegu que Dolfu fae coles melodíes, los adornos y, sobre manera, les llínies d’acompañamientu qu’apaecen en dellos temes del discu, aportando riqueza armónica ya interés a la testura’l tema.
La mención especial d’esti trabayu ye pal tema ‘Entrín y Non’, un solu de vigulín notoriu, nel que s’amiesten dos pieces estremaes del repertoriu tradicional. Pa entamar, la tonada conocida como ‘Arrea Carreteru’, popularizada por Xuanín de Mieres, a la que-y sigui un xiringüelu de Cangas que deprendieron de la interpretación de Francisco‘l de la Viliel.la, ya que foi recoyíu por García Matos.
Otru tema pa sorrayar ye ‘Escurque’, nel qu’iguaron un cantar de bodes suroccidental con dos vigulinos, siguiendo l’esquema usual d’entruga-rempuesta propiu del repertotiu nesa fastera. Esti cantar ta recoyíu nel pueblu Miraval.les en Cangas, ya xuntáronlu a una xota d’Hurria recoyida por L’Andecha Folclor d’Uviéu.
Ye recomendable l’álbum al completu, pero pa finar de falar d’ello vien a cuentu la octava pista, ‘Ende’, por ser una de les más tocaes nes sesiones folk d’Uviéu como mínimu. Ta compuesta pola versión d’Eduardo’l de Sabina d’un pasucáis del oriente, siguíu pola perconocía muñeira d’A Estierna, en Degaña, ya coronáu por una muñeira de gaita de Navia de Suarna. Namái ye, a la fin, un trabayu cimeru pa tola xente interesao nel vigulín tradicional asturianu.
Suscríbite a les nuestres novedaes
