En 2003, Felpeyu estrenaba’l sellu Tierra Discos con un álbum imprescindible pal folk asturianu: Yá!. Sedría l’últimu nel que sonaríen les voces y los instrumentos d’Ígor Medio y Carlos Redondo, que dexaríen la so buelga pa la eternidá de la música asturiana en dalgunos de los temes que suenen nél como ‘Los Fayeos de Mayo‘ y ‘D’equí a Somió‘. Con ellos siguimos la estaya de discu del mes na qu’analizamos dalgunos de los trabayos discográficos más destacaos de la música asturiana, acompañándolos d’una ufierta na tienda online.
Daquella, Felpeyu yeren Ruma Barbero -bodhrán-, Xuan Nel Espósito -curdión-, Ígor Medio -bouzouki, guitarra, baxu pedal, voz-, Fernando Oyágüez -vigulín-, Diego Pangua -gaita, xiblata-, Lisardo Prieto -vigulín, voz- y Carlos Redondo -baxu, guitarra, voz-. Amás, Elías García al vigulín, Salva López -soníu técnicu, hammond y shaker- y Boni Pérez -l’escritor de delles lletres- collaboraron nesti discu que yá ye historia del folk asturianu.
Un elementu común na discografía del grupu ye l’alternancia de temes instrumentales y vocales, nos que cuasi siempre apostaron poles lletres propies, inspiraes o non en cuartetes y cantares tradicionales. Nesti casu, Ígor Medio -‘Los Fayeos de Mayo‘-, Boni Pérez -‘Nun quiero cayer la flor‘ y ‘Faltosa‘- y Ruma Barbero -‘La Pongueta‘- apurrieron la so pluma pa escribir unos testos mesmo poéticos que populares y que yá son, tamién, parte de les Lletres Asturianes. Felpeyu siempre puxaron, nel papel y na práctica, pola defensa de la cultura y la llingua del país; preba d’ello son estes pallabres que-y dediquen a ‘La Pongueta‘ nel llibrín qu’acompaña a Yá!: «Asturies, la so cultura y la so fala, tán representaes equí por una muyer trabayadora de la montaña de Ponga. Esti cantar quier ser un homenaxe a toles asturianes caltenedores del nuestru sen como pueblu, amás d’un tirón d’oreyes a los xenocidas culturales que mos gobiernen».
Les doce pistes que suenen en Yá! cumplen con esa premisa y muncho más: axuntando melodíes tradicionales con igües que xueguen con cambios de ritmu nos sones orixinales; les composiciones d’Ígor Medio, Lisardo Prieto y Fernando Oyágüez; los característicos coros nos cantares nos qu’Ígor y Carlos punxeron la voz; eses partes de gaita que queden nel cantu la memoria y que siempre lleguen nel momentu xustu; los pasaxes punteaos que salíen del bouzouki d’Ígor… Restolando nel Cancioneru musical de la llírica popular asturiana de Torner, tomando prestaos los sones qu’otros instrumentistes-yos deprendieron y inspirándose en too ello pa dar vida a melodíes nueves, Felpeyu dieron forma a esti álbum que zarró una etapa fundamental del grupu, anque entá nun lo supieren en 2003, na qu’afitaron un soníu propiu y interpretaron dalgunos de los sos cantares más míticos.
Dalgunes curiosidaes al rodiu d’esos doce temes que suenen nel discu son l’homenaxe a la Noite Celta de Porcía pente una ‘Alborada de Porcía’ d’Ígor Medio cola que fina, precisamente, ‘Porcía‘; el diálogu de voces ente Ígor y Carlos en ‘D’equí a Somió‘, que ye una lletra tradicional dafechu y que yá grabaren tres años enantes nel Live Overseas; la mirada a la tradición coral cola melodía de ‘Faltosa‘; la decisión de caltener la estructura tradicional del módulu de baille en ‘Muñera’l Centro‘ -un exemplu únicu nos grupos folk d’esa fornada a la que pertenez Felpeyu, qu’entá nun trabayaben conscientemente con esa parte de la música asturiana que siempre tuvo cara de muyer-; y el formatu billingüe del llibretu -n’asturianu y inglés-, un fechu que desplica’l posicionamientu de la so música -tamién d’otros grupos- fuera de les llendes del país n’aquellos años d’heriedu del espoxigue del interceltismu y que los llevó a facer una xira per Australia años enantes.
Sicasí, el cantar más conocíu de Yá! ye, probablemente, ‘Los Fayeos de Mayo‘. Cuántes asturianes cantaríen con tola emoción «Pente calles de cristal / trona’l cantu del nordés / con palabres de poeta, / evocándome una idea, / tresportándome al llugar / onde ñaguo por volver, / ente los montes del sur, / onde vuela’l sitiu míu. / Onde too tien sentíu. / Onde soi quien quiero ser». Cuántes veces suañaron -y suañamos- con esa andarina que nun llegaba, la primavera que nun aportaba, mientres esti discu-yos recordaba qu’esi sitiu yera Asturies, onde, ente otros, Felpeyu interpretaben y componíen música dende los raigaños del país, torgando’l desaniciu de la cultura y apurriendo’l so granín al folk propiu, folk asturianu.
Suscríbite a les nuestres novedaes
