«Nel homenaxe a Roces va tocar una representación de más de 20 bandes de varios estilos y époques»
El 10 d’agostu finaba José González Roces, ún de los fotógrafos que más percorrió durante décades los escenarios d’Asturies cola so cámara pa retratar a una montonera d’artistes. Mui queríu y reconocíu, la noticia foi un duru güelpe pa la escena musical d’Asturies qu’esti sábadu 23 d’ochobre va rendi-y un homenaxe en Llangréu, el conceyu d’onde yera. Dende les 16h y hasta les 22h, más de 20 bandes van actuar nel patiu cubiertu del Colexu Públicu Eulalia Álvarez de La Felguera pa facer alcordanza de Roces.
«Nun vamos anunciar los nomes de los grupos porque lo que queremos ye que seya un homenaxe neutru de los músicos y músiques d’Asturies pa con Roces», comenten a Musicasturiana.com dende la organización del eventu. Sicasí, aseguren que fixeron «una representación de varios estilos y époques, de xente que tenía rellación personal con Roces», dando como resultáu más de 80 intérpretes que van ufrir 6 hores de música en directo esti sábadu con una entrada de baldre.
