Música asturiana con aire exipciu

La música tradicional asturiana vien siendo oxetu d’interés fuera de les sos fronteres dende los años finales de los 70, cuando principia un procesu d’internacionalización. Esti fechu producióse fundamentalmente col surdimientu del folk contemporáneu llariegu, de tipu célticu/atlánticu, y el so posterior puxu y sonadía. Nun primer momentu los intérpretes d’esi ámbitu foron los que repararon nos nuestros sones y ritmos, asina músicos bretones, escoceses y irlandeses, fundamentalmente, escomenzaron a grabar nos sos discos pieces provenientes de la tradición musical asturiana. L’éxitu d’Hevia, yá nos 90, espardióla mundialmente, llegando prácticamente a tolos requexos del planeta.

Sicasí, dende hai un tiempu, la nuestra música ye materia d’interés por parte d’escenes sonores que poco o nada tienen que ver con ella. Ye’l casu del compositor exipciu Tarek Elazhary, que tien trabayao abondo col famosu intérprete d’oud (instrumentu de cuerda) iraquí Naseer Shamma, amás de ser profesor na Casa Árabe Oud n’El Cairo. Tamién dirixó cursos de música tradicional na Universidá Alemana d’esa ciudá y actuó col conxuntu de música árabe d’esa institución académica. Anguaño, Tarek busca preservar la herencia musical del Mediu Oriente, mientres esplora’l so sitiu dientro d’un contestu contemporáneu. Otra manera, ye’l cofundador de la banda instrumental Dokkan, que combina influyencies orientales con instrumentación occidental actual.

Anque apaeció hai dellos meses (abril del 2020), la situación d’andanciu mundial fixo que pasare desapercibida una reellaboración fecha por esti compositor exipciu de la tonada Coyí d’un artu una flor, una de les más conocíes del repertoriu de la música vocal asturiana. Una versión en clave oriental que-y da un aire nuevu dafechu y aporta una visión ente atractiva y sorprendente d’esta pieza icónica. Nella, Tarek Elazhary (oud), acompáñase de la tamién intérprete exipcia Salma Amr na percusión (riq) y de la flautista inglesa Tamsin Elliot.

Mira’l videuclip de la reellaboración de Coyí d’Un Artu una Flor

Dexa un comentariu

X