Picarós y Leticia Baselgas participen esta selmana nos XIII Alcuentros de Músiques Asturianes de Xixón

Güei a les 19.00h, nel Muséu Casa Natal de Xovellanos, el tríu folk Picarós va presentar el so primer discu homónimu dientro de los XIII Alcuentros de Músqies Astutrianes de Xixón. Esti eventu, entamáu pola Oficina de Normalización Llingüística de Xixón y el Taller de Músicos de Xixón, vien ufiertando delles actividaes y conciertos dende finales de mayu, y hasta’l 13 de xunu van continuar desendolcando actividaes gratuites rellacionaes cola música’l país.

Picarós, el tríu formáu por Iván de Trubia a la gaita y whistles, Dani de la Nava a les guitarres y Chus Fernández Al Bodhran, presentó l’añu pasáu el so trabayu «Son d’Ermu», un discu de folk con tintes modernos; tirando pela llínia d’un formatu pequeñu pero con una sonoridá mui contundente. Con esti trabayu algamaron una nominación a «meyor discu de folk» nos premios AMAS, y tamién foron finalistes nel concursu Runas del Festival Internacional do mundo Celta de Ortigueira. Esti 2025 siguen cola xira de presentación del discu, con na menos qu’once feches per Asturies y tamién fuera d’ella, con varios conciertos per Córdoba, Cantabria y Segovia.

Mañana, 5 de xunu, a les 19:30 y nel patiu del CCAI (Centro de Cultura Antiguo Instituto), la programación de los alcuentros complétase enforma cola presentación del llibru de Leticia Baselgas, Diarios D’Una Panderetera. El llibru, publicáu va unos meses, fala de la so trayectoria dende un grupu de baille postfranquista hasta’l so papel na creación d’un estilu (o moviemientu) nuevu na escena asturiana, como ye el post-folk. Unes páxines pa reflexionar sobre lo tradicional, los imaxinarios, la creatividá y el nuesu papel dientro de la tresmisión de la cultura de tradición oral. Na presentación van intervenir tamién la editora Alicia Álvarez (La Fabriquina) y el músicu y musicólogu Llorián García.

Demás programación

Completen l’axenda la selmana que vien el conciertu de Cubasturia Jazz -cuartetu qu’entemez la música tradicional d’Asturies col jazz cubanu- el miércoles 11 a les 19.30h nel CCAI y el vienres 13 a les 20h «una tarde en danza al mou Xixón» cola participación de Soi Panderetera -agrupación formada pol alumnáu de la EMT La Quintana- y del cuartetu Rollu Folk.

.