OTERO, VÁZQUEZ, D’AREÑES – Cancioneru de la Gaita Asturiana. Vol III

Cancioneru de la gaita asturiana. L’archivu d’Armando Fernández Robledo ye un volume bibliográficu ellaboráu por Eugenio Otero Vega, Fernando Vázquez Cárcaba y Rubén d’Areñes centráu nel llabor del gaiteru Armando Fernández Robledo, intérprete del conceyu de Siero qu’a lo llargo de bien d’años foi iguando un archivu percompletu nel que se recueyen melodíes y pieces de bona parte d’Asturies. Esta obra compila 102 melodíes de 25 gaiteros.

Esti intérprete ye una figura respetada nel mundu de la gaita asturiana por una triple faceta: artesanu constructor de gaites, investigador y recopilador de repertoriu tradicional; anque nun ye una persona especialmente mediática, el so trabayu tuvo una influyencia bultable na conservación del patrimoniu musical asturianu. Estudió modelos antiguos de gaites, les sos midíes, l’acústica y la evolución del instrumentu, formando parte d’esa xeneración d’artesanos qu’a partir de los años setenta y ochenta impulsaron una renovación técnica de la gaita asturiana ensin perder la base tradicional. A lo llargo de décades foi creando un ampliu archivu manuscritu de melodíes, copiando partitures, recoyendo repertoriu oral y comparando variantes de distintes comarques y gaiteros. Esi fondu documental ye’l que sirvió de base al llibru Cancioneru de la gaita asturiana. L’archivu d’Armando Fernández Robledo, qu’agora asoleya Ediciones Trabe.

L’oxetivu de la obra de 467 páxines ye poner a disposición de gaiteros y estudiosos un fondu documental de gran valor, formáu a lo llargo de décades de recopilación de melodíes, manuscritos y materiales tradicionales; ente otros materiales inclúi: la catalogación y edición del archivu manuscritu, más d’un cientu de partitures de repertoriu tradicional pa gaita, notes crítiques sobre la procedencia de les pieces y les variantes, información sobre los gaiteros y les fontes de les que proceden les melodíes y un estudiu introductoriu que contestualiza la figura d’Armando Fernández Robledo y la importancia del so trabayu como recopilador.

Esta publicación tien un valor especial porque l’archivu recueye melodíes procedentes de gaiteros de distintes zones d’Asturies y conserva versiones tradicionales que, en munchos casos, nun figuraben n’otres publicaciones. Según la editorial encargada de la publicación: «Tamos énte una obra que, perriba de too, fai un homenaxe sinceru a tolos que fixeron de la gaita’l so oficiu, a cada esllabón que caltuvo la cadena de la tradición pa los que vinieron detrás».