La marca de ropa Puru Remangu asoleyó apocayá la colección Romería pa reivindicar estes fiestes populares asturianes. Agora, coincidiendo col entamu del branu y col arranque de les romeríes que se van esparder per tol país, asoleya una playlist fecha en collaboración con musicasturiana.com que recueye 35 temes. La llista de reproducción ta dixebrada en tres partes: una colos 15 cantares presentes nel «Cancioneru de Romería» qu’editó la marca, cola particularidá de que munches de les pieces tán reinterpretaes dende distintos estilos musicales: folk, pop, rock, punk, indie… La segunda parte ta formada por hits de les romeríes tradicionales: xotes, muñeires, pasudobles, valsiaos, xiringüelos… que percuerren tola xeografía asturiana; dende un «Pericote» del oriente hasta un «Son d’Arriba» del suroccidente, pasando per muñeires de centru o del Navia-Eo. Y yá pa rematar, suenen cantares del sieglu XXI, gracies a la reellaboración qu’anguaño se fai de la tradición dende soníos electrónicos, rockeros y/o con lletres reivindicatives. Y nesta despidida nun podía faltar un homenaxe a una bona fiesta prau nin una danza, el baille col que s’acaben toles romeríes.
Asina presenta Puru Remangu esti nuevu diseñu:
«La Romería, la madre de toles folixes.
El llugar onde se xunta’l pueblu a pasalo bien.
De romería cantamos, baillamos, xintamos,rondamos y engalanámonos.
¡Rífase una xata!
¡La puya’l ramu!
Yá entamó la bandina…
Nesti prau vamos baillar la danza, y dempués
un pericote, el xiringüelu, la xota Cangas y
unos agarraos.
Una romería en cada pueblu.
Na que toes baillemos al son que más nos preste.
Una romería en cada pueblu.
Cada pueblu arguyosu de la so romería.
¡Viva’l baille!Les feries y les romeríes son ún de los elementos más espardíos de la identidá asturiana. Nun hai pueblu que nun tenga la so romería nin cuasi persona que nunca tuviera nuna en dalgún momentu de so vida.
La romería ye un tiempu pal disfrute, pa compartir, pa facer comunidá, pa socializar… tamién ye una esperiencia d’autoorganización vecinal y una de les meyores ferramientes qu’hai pa tresmitir la cultura popular. Sicasí, dende va unos cuantos años fueron perdiéndose dalgunos de los rasgos distintivos de les romeríes asturianes, éstes van amenorgando la so incidencia social y incluso cada vez ye más difícil el relevu xeneracional y la participación popular nes comisiones de fiestes.
Dende Puru Remangu reivindicamos los valores que representen les romeríes y por eso queremos puxar por ellos dende una perspectiva fresca y actualizada, pa espardelos ente la sociedá asturiana d’anguaño y asina ayudar a que tengan futuru».
Suscríbite a les nuestres novedaes
