L-R siguen publicando adelantos del que va ser el so tercer discu de llarga duración. Tres «Anda neña» y «Trébole» aporta «Menodito«. Trátase d’una versión actualizada d’un gran clásicu del folclor: «Beil.lalo, Menodito», un cantar recoyíu por Alan Lomax en 1952 de voz d’Honorina Riesgo y perteneciente al archivu del etnomusicólogu estaunidense. Nesta propuesta creativa el dúu formáu por Leticia Baselgas y Rubén Bada collabora con otru pernomáu dúu de la escena estatal: Los Hermanos Cubero.
El resultáu d’esperimentación musical define una sonoridá tresversal, mui particular, con una espresión mui averada a la radicalidá de los soníos vaqueiros propios de la tradición entemecíos cola sonoridá característica de Los Hermanos Cubero, con mandolina y una voz mui suxerente que convida a viaxar a los soníos de la meseta castellana. Ensin perder les sos personalidaes úniques, dambos dúos presenten un cantar tradicional que, si yá impón na so versión orixinal, algama agora una vida nueva enllena d’armoníes y d’un atractivu que s’adientra hasta lo más fondero de los raigaños.
Too ello compleméntase col usu de la semeya d’Honorina Riesgo, cedida pol Archivu Sonoru d’Alan Lomax pa la so portada, y un videoclip fechu pol propiu grupu con pincelaes lisérxiques que nos lleven a les nueches de folixa y baille de los vaqueiros en tiempos d’alzaes.
Suscríbite a les nuestres novedaes
