Na tarde del 22 de xunu presentóse nel RIDEA (Uviéu) una asociación nueva al rodiu de la gaita asturiana: el Conceyu de la Gaita. Dellos gaiteros y gaiteres, profesionales y aficionaos, y facedores de gaites asturianes coincidieron na necesidá d’entamar un ente asociativu que dinamizara’l mundu de la gaita d’un xeitu tresversal. Toles persones convinieron que fai falta entamar un llugar de comuña p’alendar actividaes y proyectos, al tiempu qu’ufrir rempuestes a una serie de necesidaes que tienen les persones amantes del instrumentu.
Entamáu’l actu por un afectivu aliendu de D. Andrés Martínez Vega, miembru del RIDEA y cronista de Piloña, presentóse énte un salón enllenu de públicu la primer xunta provisional del Conceyu de la Gaita: presidente Flavio Rodríguez Benito (mayestru nel Grau Profesional de Gaita del Conservatoriu d’Uviéu), vicepresidente Rodrigo Fernández Joglar (pedagogu y graduáu profesional en gaita asturiana), secretariu Tomás Esolá Muñiz (Inxenieru de Mines y gaiteru), tesoreru Esteban González Corteguera (llicenciáu en Medicina y gaiteru) y los vocales Chus Solís (artesanu de gaites), Pelayo Fernández Fernández (doctor en Inxeniería Industrial, gaiteru y artesanu de payueles) y Luis Álvarez Pola (doctor en Musicoloxía y gaiteru).
Esta xunta provisional faló sobro los antecedentes, motivaciones, oxetivos xenerales y específicos, estatutos, propuesta d’actividaes y el procesu de constitución. El so secretariu, Tomás Esolá, emplazó a los interesaos a una segunda reunión que va celebrase’l 6 de xunetu, na que va formase’l primer llistáu de persones que tres d’el pagu añal de 20 € van quedar como socios y socies y qu’exercerán esi día’l so derechu a votu de les diferentes candidatures qu’optarán a conformar la xunta directiva definitiva qu’ha dirixir el colectivu demientres los próximos cuatro años. El colectivu yá ta presente nes principales redes sociales (Facebook, Instagram y Twitter) onde pue lleese’l documentu fundacional, asina como’l vídeu del actu de presentación.
.
Suscríbite a les nuestres novedaes
