El vienres 28 de payares a les 19.30h el Teatru Auditoriu Teodoro Cuesta de Mieres va acoyer la II Gala Pola Salú Mental. Tres del éxitu de la primer edición, Banksyastur y l’asociación Abrazos Verdes entamen esti eventu qu’axunta música y teatru pa recaldar perres que van donase a entidaes que trabayen pa facer frente a les enfermedaes de salú mental. Nesta gala, la música n’asturianu va sonar con un conciertu de Mapi Quintana y Voodoo Grass -que tamién tien dalgún tema n’ast nel so repertoriu-.
«L’añu pasáu nel auditoriu tuvi l’honor d’entamar una gala solidaria xunto y en favor de l’asociación Abrazos Verdes pa sofitar a persones afectaes por suicidiu. Gracies a la recaudación d’esti eventu, pudo ponese en marcha un recursu que tien dellos proyectos, ún nomase ‘Para CuidarT’, y ta creáu para dar sostén y acompañamientu emocional a los seres queríos de quienes tán sufriendo la conducta suicida«, desplica Banksyastur n’Instagram al rodiu d’a ónde va la recaudación algamada nesta gala solidaria: «l’oxetivu ye siguir calteniendo’l recursu y esti proyeutu que tan bien ta faciendo, otru añu más».
Pa sofitar la iniciativa los donativos tán a la venta por 12 euros online, na Peluquería Morán (Sama), Llibrería Matatero Uno (Uviéu), Llibrería La Revoltosa (Xixón) y Llibrería La Llocura (Mieres) y con él va poder vese esta gala presentada pola comunicadora Arantxa Nieto y na que, amás de Mapi Quintana y Voodoo Grass, actúen Silvidos, Gemidos y Barrenidos y el grupu de teatru improvisiación Trivilorio ye Impro. «Vamos tener l’honor de ver y sentir a estes y estos artistes, que van apurrir altruistamente alegría, diversión y esperanza, pa que cuando baxé’l telón siga dándose llume pa menguar la murnia y l’amargura a quien lo necesite«, conclúi Banksyastur.
Suscríbite a les nuestres novedaes
