La nueche de les fogueres llega esti añu con una montonera d’eventos espardíos pela xeografía asturiana. Nesta noticia facemos repasu a dalgunos, nos que va tar bien presente la música asturiana.
En Mieres, entamen los dos últimos díes de les fiestes de San Xuan, que vienen cellebrándose dende’l 13 de xunu, con variedá d’actuaciones d’artistes y agrupaciones tradicionales. Güei llunes, a les 20.00h va tener llugar l’enrame de les fontes cola participación de los siguientes grupos: El Grupu de Baille Prau Llerón tará na Fonte del Ayuntamientu, en La Vega y en Manuel Llaneza. El Grupu de Baille Ruxidera, nel Paséu de la Estación del Vascu. El Grupu de Baille L’Artusu na Escultura de Pepa “La Llechera”. Y la Banda de Gaites Villa de Mieres nel Parque Aníbal Vazquez y la Cai Cabezas. Más tarde a les 21.00h, l’alcuentru d’estos grupos de baille y la banda de gaites na Plaza Requexu. Ya pela nueche, a les 00.00h, na Plaza del Ayuntamientu va prendese la foguera, col Grupu Folclóricu Prau Llerón, pa lluéu dar pasu al conciertu de Camela, a la 01.00h, nel Parque Xovellanos. La programación zarra mañana, 24 de xunu, col conciertu a les 19.00 h. de Sólo (el nuevu proyectu d’Alfredo González), nel Parque Xovellanos.
Grau fae tamién un programa pa estes fiestes alrodiu de la cultura tradicional. A les 18.30 y a les 19.30h, va facese l’enrame con dances primes de les fontes de la Casa de Cultura y de la Plaza Álvaro González, respectivamente. A partir de les 21.30h, un desfile de personaxes mitolóxicos y l’espectáculu «Cantos de Fuego» van percorrer les cais de la villa dende la Plaza General Ponte hasta’l Frontón. A les 23.00h, un taller de Baille ya música nel Parque d’Arriba sedrá’l preludiu al prendíu de la foguera, con danza, que tendrá llugar a les 00.00h nel mesmu llugar.
Nava tamién cellebra San Xuan con música asturiana. Va facese la foguera na Plaza Manuel Uría, a les 00.00h, suiguía del conciertu del tríu de folk Entós, a les 00.15h.
N’Uviéu, el Coru de Muyeres de San Esteban va amenizar un pasucáis d’enramáu de fontes, a les 17.30h, saliendo dende la cai Marqués de Gastañaga, con baille de dances primes en caúna de les fontes. Dende les 17.30 a les 20.30h, dellos talleres infantiles van tener llugar na Plaza Porlier, con ellaboración de mázcares, cuentos tradicionales, etc. La Banda de Gaites «Ciudad de Oviedo» va facer desfile pel Cascu Antiguu, a partir de les 18.30, y pa les 19.30h, vamos poder sentir el conciertu na Plaza de la Escandalera del Coru de Muyeres de San Esteban. A les 00.00h, va prendese la foguera, faciendo la danza prima.
En Xixón, dende les 18.00h, na Playa de Poniente, van actuar les bandes de gaites Conceyu de Xixón, Garulla, Magüeta de Xixón, Noega, Villa de Xixón, y Saxum. Amás, pa facer tiempu hasta la foguera, a les 21.30h, vamos poder esfrutar del conciertu d’Ún de Grao nel Pobláu de Santa Bárbara.
En Ribeseya, nel Prau de San Xuan, va tar amenizando la tarde la Bandina Los Muiles, a partir de les 20.00h y a medianueche va facese la foguera baillando la danza prima. Dempués, un espectáculu de fuegos artificiales y DJs continuarán cola cellebración.
N’Avilés, el grupu Ximielga La Saya va llevar baille y música a la Plaza de Pedro Menéndez dende les 23.30h. Tres prender la foguera, va facese una danza prima alredor.
Llaviana acueye tamién estes fiestes colos conciertos de Skama la Rede y Fe de Ratas, a les 22.00h nel Quioscu de la Música de La Pola.
En Corvera, nel Embalse de Trasona, vamos poder esfrutar d’actuaciones y espectáculos de baille y circo dende les 18.00h, y pela nueche, nel «Práu de la Folixa», del conciertu d’Argayu a les 22.00h y d’un pasucáis de la Banda de Gaites de Corvera a les 23.00h. Tamién a les 23.00h, nel espaciu nomáu «Área Foguera» va tener llugar un conciertu d’Ajo Band, siguíu de l’actuación de la soprano Susana Gudín. Tres la foguera, Dani Parrondo Show va poner música el restu de la nueche.
Equí tan los cartelos de les fiestes:
Tola programación detallada d’equí a los próximos meses pue vese na Axenda de Musicasturiana.com.
Suscríbite a les nuestres novedaes
