6 Riales llancen un adelantu del discu ‘Sutripar’, que presenten esti vienres en directo

Dempués de dellos años pisando escenarios per tol país, 6 Riales van publicar Sutripar, el so primer discu de llarga duración. L’álbum va presentase en directo esti vienres 27 d’ochobre nel Nuevu Teatru de La Felguera, nun espectáculu especial nel que va haber collaboraciones y otres sorpreses. P’adelantar lo que se va poder sentir nesti trabayu el tríu de voz y percusión tradicional llanza l’adelantu «Astierna» en toles plataformes musicales, un amestao de rumba y pasudoble.

Sutripar ye l’espectáculu col que’l tríu formáu por Elisabeth Montequín, Alba Menéndez y Natalia Riestra lleva más de dos años actuando per toa Asturies. Cantares de la tradición asturiana, d’otres zones de la Península y temes de composición propia dan forma a estes canciones nes que les protagonistes son la voz y los instrumentos de percusión tradicionales (llata pimentón, panderetes, panderu, cuyares, morteros…). A partir del 27 d’ochobre estes pieces van poder sentise nel primer CD d’esta formación, grabáu nos Tutu Estudios de Corvera..

Pa presentar esti trabayu 6 Riales rodeáronse de dellos artistes que van acompañales enriba del Nuevu Teatru de La Felguera. El multiinstrumentista tradicional Navia; el cantante, curdioneru y percusionista tradicional de L.laciana Sabu -tamién cabezaleru de D’Urria-, y la pernomada cantadora de tonada Anabel Santiago van collaborar col tríu na so gala. Amás, la intérprete en llingua de signos Julia García va encargase de da-y l’accesibilidá al espectáculu pa que toles persones puedan disfrutar d’él.

Entrada con reserva

A les 20.15h d’esti vienres arranca esta gala que tien entrada de baldre. Sicasí, les persones que quieran dir van tener qu’acutar la entrada escribiendo a seisriales@gmail.com enantes del xueves 26 a les 12h la mañana. Esi día tamién van ponese a la venta les copies físiques d’esti discu; un CD que cola so portada quier tresmitir «la imaxe de la muyer actualizada, Independiente, lluchadora y coraxosa, que nun arrenuncia a quién ye nin a la so hestoria y que ve na tradición y la so naturaleza, una forma d’espresión y d’identidá propia», como comenten dende 6 Riales.