Folk, punk-ska, bandines, gaita, corales… delles espresiones de la música n’asturianu van sonar dende esti vienres 27 hasta’l domingu 29 en Mieres y Avilés dientro de dos destacaos eventos: ; la fiesta de la Serondaya de Cenera (Mieres) y la Seronda d’Avilés. Ente los dos eventos axunten un total de quince actuaciones de música del país, amás de programar conciertos d’otros artistes de fuera d’Asturies.
L’Asociación Cultural Serondaya de Cenera (Mieres), vuelve a entamar otru añu más la Fiesta de la Serondaya. La cita arranca’l vienres 27 a les 20h col pregón del cantante Chus Pedro y la entrega del Premiu de la Cultura 2023 a l’Academia de la Llingua Asturiana. A les diez de la nueche van tocar Skama la Rede col so punk-ska-folk. Pal sábadu 28 les actuaciones musicales entamen a les 18h col Grupu Ruxidera, al que van siguir les bandines Los Gascones (19h), Los Llerones (20h), el grupu chigrebilly Ilustres Patilludos (22h) y la banda mecigayu-ska La Tarrancha (23h). La programación de música de raigañu zárrase’l domingu 29 a les 13h cola actuación de la Banda Gaites de Mieres.
Per otru llau la Seronda d’Avilés aporta a la so XX edición. La Federación d’Asociaciones Xuntanza d’Avilés entama nel mercáu de la Plaza de les Aceñes esti eventu qu’arranca’l vienres 27 a les 19.15h cola Bandina Cuatrolán, formación que repite actuación a les 21.30h. A les 20h Xaréu d’Ochobre y Escontra’l Raigañu van amosar bailles y sones tradicionales y a les 22h toca la banda cántabra de folk actual Casapalma. Pal sábadu 28 la programación musical entama bien ceo: a les 12h ye’l turnu de la orquestina La Xarangana, a les 12.30h hai cantares de chigre col Orfeón de Castrillón y, llueu d’otres actividaes más, a les 20.30h son los conciertos Rubén Alba y Nel de Purnea y a les 21.30h de José Manuel Tejedor.
Suscríbite a les nuestres novedaes
