La espera pagó la pena. Vuelve Mapi Quintana dempués de 9 años. Vuelve’l sentimientu, vuelve la emoción, vuelve’l tratar con ciñu cada nota, cada acorde, cada frase recoyida de la tradición oral asturiana, cada melodía popular, cada momentu d’improvisación. L’artista nun regresa con un discu, sinón con dos: Música pa tornar páxaros y La Maramoniz. Son un total de 14 canciones que reflexen por qué Quintana ye un nome con mayúscules na escena del jazz y el folk.
Música pa tornar páxaros nació como obra escénica en 2022. Esi añu el Festival Intercélticu de Lorient -el más prestoxisu del mundu celta- dedicó la so edición a Asturies y el gobiernu asturianu encargó a Mapi Quintana la obra inaugural del festival. Asina nacieron estos 7 temes nos qu’hai influencies del jazz, la música impresionista y la tradicional asturiana. Una delicia pa los oyíos que va directamente al corazón, porque la emotividá enllena les lletres. Nelles fálase de memoria histórica, de persones queríes que yá nun tán equí… siempre col telón de fondu de Saíle, esi paxarín que fai alcordanza d’Elías García, compañeru musical de Quintana -y ún de los nomes más importantes del folk asturianu- que finó prematuramente en 2019.
Del protagonismu de les armoníes y les voces y la mestura de soníos d’époques modernes y estétiques distntes que ta presente en Música pa tornar páxaros, pasamos a la tradición de la que bebe La Maramoniz. Nun hai meyor mirada a los raigaños culturales d’Asturies que la que saques cuando pases una tarde con to güela na cocina. Sentir les sos vivencies, los sos cantares, la so forma de ver el mundu… da pa muncho y too esto refléxase nesti otru discu entituláu La Maramoniz, que ye tamién l’aldea de la güela de Mapi Quintana. Xunto cola so formación nueva, asoleya 7 temes nos qu’entemez la tradición asturiana nes melodíes y temátiques con estétiques más vanguardistes nos arreglos. Hai cantares populares y composiciones propies que te faen viaxar de L.lena a Valladolid, amosando un gran respetu pola tradición y un xeitu impecable a la hora de reellaborala col conocimientu de les músiques d’anguaño.
Pero Mapi Quintana nun ye namás música. Insistimos, ye emoción. Ye una auténtica frontwoman qu’enriba d’un escenariu sabe ponete’l pelleyu de pita, facete reir y hasta llorar. Los cantares que recueyen estos discos multipliquen la so efectividá enriba d’un escenariu, gracies a una banda de musicazos y a les tables, la naturalidá, el criteriu y el discursu que Mapi tresmite coles sos pallabres en cada conciertu. Y como tolo que fai trátalo con mimu, los discos tamién tán mui cuidaos a nivel estéticu: Música pa tornar páxaros asoleya nun formatu únicu, una caxa de cartón artesanal que tien dellos elementos decorativos y inclúi una postal por cada cantar. Marina Durany y Leticia Baselgas son les diseñadores de caún de los trabayos, que tán producíos, mezclaos y masterizaos por Fernando Arias y grabaos polos músicos Sonia Cartón (voz, teclaos y otros instrumentos de tecla), César Latorre (piano y otros instrumentos de tecla), Juanjo Díaz (percusión), María San Miguel (voz y violín), Eladio Díaz (saxo), Fernando Arias (vibráfonu) y Arturo Valero (contrabaxu).
La consolidación
Con estos dos trabayos esta artista consolídase. Nacida nel conceyu L.lena y con estudios universitarios musicales cursaos nel Conservatoriu d’Ámsterdam, lleva 25 años formando parte de proyectos rellacionaos col jazz, cola música tradicional y cola improvisación. En 2009 asoleyó’l so primer discu en solitariu, El Sonar de les Semeyes, que supunxo toa una novedá dientro del jazz y la música de raigañu. Amás d’ésti, tien otros ocho trabayos publicaos tanto participando xunto a formaciones como Blima, Aire o Eladio Díaz Folk Ensemble, como a dúu col yá fináu músicu folk Elías García (Severina); y a tríu con Michael Lee Wolfe y Jacobo de Miguel (Xota pa Tres). Tamién toca na banda de Rodrigo Cuevas. Mapi Quintana ye toa una titana a la que ye imposible nun almirar y agora vuelve a amosalo.
Suscríbite a les nuestres novedaes
