La banda asturiana de power metal Argion ta acabante d’asoleyar Vltreia, el so tercer trabayu discográficu. Nesta discu, el grupu presenta un cantar mui especial: ‘La nuesa tierra’, interpretada n’asturianu y cola collaboración de José Pardial, vocalista d’Avalanch. D’esta manera, dos grandes voces de la escena metal estatal axúntense pa dar forma al primer tema que la formación asoleya na so llingua materna.
«Creo qu’hai daqué interesante detrás d’esti tema: llevar l’asturianu al power metal, un xéneru nel que nun ye habitual atopar cantares na nuesa llingua«, desplica Richard de la Uz, vocalista d’Argion, sorrayando que «esti idioma tien espaciu en cualquier estilu musical y que puede tresmitir la mesma fuercia, emoción y épica que cualquier otru». «Acullá de lo musical, pa nós tamién ye una cuestión d’identidá; l’asturianu tien de tar presente en tolos espacios culturales, y el metal nun tendría de ser una escepción», añade’l cantante.
La presencia del pixuatu José Pardial, cantante d’Avalanch, una de les bandes con más renome de la escena metal nel Estáu español y Llatinoamérica, «refuerza’l calter d’una propuesta que amesta metal, identidá y compromisu cola cultura propia», comenta de la Uz al rodiu esta collaboración nun cantar que tien una lletra épica dedicada a Asturies y al sentimientu de pertenencia a ella.
Argion nació n’Uviéu en 2014 influenciada por referentes del metal estatal como Warcry, Avalanch, Dünedain, Tierra Santa o Saratoga. Na so propuesta la épica tien una exa central, mesmo na música como nes lletres, y nel so álbum nuevu dan un pasu más reflexando la so faceta más humana y emocional pa falar d’histories personales reales y cercanes.
Tres d’actuar en festivales de referencia del xéneru como Leyendas del Rock, Sun & Thunder, Gineta Rock y Z Live! Rock Fest, agora llancen esti tercer discu, Vltreia, y entamen una xira que yá tien confirmada 13 feches per tola península ibérica. Nella va sentise la llingua asturiana gracies a ‘La nuesa tierra’, un cantar qu’esparde l’idioma propiu ente públicos y tierres nueves.
Suscríbite a les nuestres novedaes
