A primeros de 2022 el míticu grupu d’agro-rock Los Berrones entamaron la xira Añu 1 D.C (Dempués del Covid) cola que diben a festexar 35 años ininterrumpíos de rock n’asturianu. Compostela, Santander, Zamora, Madrid o Asturies foron d’algunos de los llugares a los qu’aportó esta xira especial na que collaboraron otres formaciones como la Banda Música de Pravia, Miguel Fernandi «Burilo» (Skama la Rede), Nando Agüeros o los Gaiteros del Carbón, entre otros y na que congregaron a más de 30.000 persones nel conciertu de la Semanona en Xixón. Agora aporta’l final: el sábadu 12 de xineru los de Tolivia van dar l’últimu conciertu na Sala Albéniz de Xixón.
Les entraes yá tán a la venta pa esta actuación que va dar empiezu a les 21.30h del sábadu 12. Les anticipaes cuesten 18 euros y pueden mercase na web www.losberrones.com, mientres que na puerta van costar 22 euros. Dende A Mansalva -organizadora del eventu- anuncien que va ser un conciertu especial por mor del final de la xira 35 aniversariu del grupu.
Nestos dos años de xira, el grupu fizo varies publicaciones como’l Diccionariu Berrón, un llibru con pallabres o espresiones escuchaes una y mil veces de boca de la xente’l pueblu y que Los Berrones incluyen nos sos cantares. El Diccionariu Berrón tien tamién les ilustraciones de Neto García del Castillo y testos de David Villa, Aitana Castaño, Alex Galán, Marisa Valle Roso, Pablo Texón, David Castañón y Montse Tomé. Tamién publicaron un llote de cerveza artesano conmemorativu, varios modelos de camisetes, sudaderes o sombreros de paya. Too ello pa celebrar más de tres décades de rock rural n’asturianu.
Suscríbite a les nuestres novedaes
