Esti fin de selmana hai tres cites col rock n’asturianu, una nueche en danza y una amuesa d’asturianada

Los Berrones y Diañu Blues toquen en Xixón, n'Uviéu hai folixa de Les Pites Ensin Gallu y conciertu d'Ilustres Patilludos y en Teberga tonada.

Eventos

El rock n’asturianu va ser el protagonista de l’axenda de conciertos d’esti fin de selmana coles actuaciones de Los Berrones (vienres 12, sala Albéniz) y Diañu Blues (sábadu 13, Páramo Bar) en Xixón y Ilustres Patilludos (sábadu 13, La Salvaje) n’Uviéu. Amás, la capital asturiana tamién va acoyer el sábadu una nueche en danza entamada en Lata de Zinc por Les Pites Ensin Gallu y los escolinos y escolines d‘Anabel Santiago van actuar el domingu na Taberna Narciso de Teberga. D’esta manera’l rock y los sones tradicionales suenen nestes cuatro cites qu’hai cola música’l país.

Con toles entraes yá escosaes, Los Berrones van xubir el vienres 12 al escenariu de la sala Albéniz de Xixón. Va ser un conciertu perespecial nel que los de Tolivia van poner fin a la xira cola que cellebraron 35 años d’actividá ininterrumpida. La mesma villa de Xovellanos va pasar el sábadu 13 del agro-rock al blues n’asturianu gracies al conciertu que Diañu Blues va dar nel Páramo Bar. A les 21h y con entrada de baldre, el cuartetu xixonés va presentar oficialmente en directo’l so EP ¡Puxa’l Ximielgue! y nesta actuación van tar acompañaos por Javier Silva, saxofonista col que firmen esti trabayu,

Uviéu va tener una doble cita cola música asturiana. Per un llau Ilustres Patilludos van llevar el so chigrebilly a la sala La Salvaje nun conciertu xunto a Indocentes y La Familia Culebra qu’entama a les 20.30h y tien un preciu d’entrada de 12 euros. Pel otru Les Pites Ensin Gallu entamen en Lata de Zinc la so tradicional Nueche en Lata. Dende les 21.30h y con un preciu d’entrada de 3 euros va haber escenariu abiertu pa baillar y tocar tradi nun espaciu nel que «nun se van tolerar comportamientos machistes ni lgtbifóbiso». Amás la formación anuncia que’l «outfit tradifantasía más molón de la fiesta va llevar premiu». «Animáivos a combinar saya y dengue con crop top y purpurina y preparái un modelazu d’infartu», comenten les organizadores nes sos redes sociales.

Canción asturiana en Teberga

Pa zarrar la programación del fin de selmana les y los escolinos d’Anabel Santiago van ufrir una amuesa d’asturianada na Taberna Narciso de Teberga’l domingu 14. La cita va ser a les 13h y con entrada llibre.