Fechu n’Asturies (2007-2008): l’antecedente de Musicasturiana.com

Ente 2007 y 2008 l’anguaño responsable de Musicasturiana.com editó Fechu n’Asturies. Fancín del panorama musical alternativu asturianu. Dende l’AMCA recuperamos y dixitalizamos los tres números qu’asoleyaron d’esta publicación que reflexa un momentu mui dinámicu pa la música d’Asturies y el so contestu social.

La década de los 80 y los 90 supunxeron un españíu contracultural. Si la numberosa xeneración del baby boom (nacíos ente 1949 y 1968) foi la que se rebeló contra la dictadura franquista y la qu’entamó a desendolcar fenómenos como’l de les radios llibres, los fancinos o la okupación; la llamada Xeneración X (1969-1980) dio-y continuidá y entamaría lluches nueves como la de la Insumisión o’l movimientu antiglobalización. Los y les millenials (1981-1993) foron los herederos de tou esti mundu “alternativu” que nun diba morrer del too con esta xeneración, pero sí que se diba amenorgar muncho la so incidencia y tresformase llueu fondamente.

«Los conflictos llaborales, les detenciones de Fernando González y Cándido y Morala, les movilizaciones del Conceyu Abiertu Pola Oficialidá o l’Arecismu marcaríen el contestu nel que nació esti fancín»

L’asesinatu de Carlo Giuliani na Contracumbre del G8 en Génova (2001), la llaceria del Prestige y la respuesta delNunca Máis (2002) o la Guerra d’Irak y les grandes movilizaciones del Non a la guerra (2003); foron dalgunos fechos globales que contribuyeron a politazase a una xeneración que tamién medró sintiendo cantares como “El vals del obrero” de Ska-P. Nel casu d’Asturies, daben les últimes boquiaes les grandes protestes del sector naval, de la minería y otros conflictos llaborales; hubo una persecución a la contestación social con casos como la detención del militante independentista Fernando González (2005) o la de los sindicalistes Cándido y Morala (2007); y el Conceyu Abiertu Pola Oficialidá (2004-2009) entamaba grandes movilizaciones en defensa del idioma. Yera la época del Arecismu (1999-2011), esos once años marcaos polos gobiernos d’una persona tan contraria a la llingua y a la identidá asturiana como foi Vicente Álvarez Areces. L’ex Presidente calificaba tamién de «Leyenda Urbana» el fechu de que milenta mozos y moces del país tuvieran qu’emigrar pa poder tener un futuru llaboral dignu; un fenómenu que s’entamó a producir a finales de la década de los 90 con unes terribles consecuencies demográfiques, económiques, culturales y sociales qu’entá siguen vixentes.

«Fechu n’Asturies nacía con una tirada de 1.000 exemplares, autoxestionáu dafechu, con una perspectiva mui crítica col establishment y d’él diben editase tres númberos ente marzu de 2007 y xineru de 2008»

Nesti contestu nacía en 2007 Fechu n’Asturies, fancín del panorama musical alternativu asturianu. La iniciativa nació de la mano del anguaño responsable de Musicasturiana.com, Xicu Ariza (Xixón, 1989), que daquella yá yera guitarrista nos grupos punk Ásperos y ska-fusión Fala Non Caduca, yá militaba na izquierda nacionalista asturiana y yá tenía entamao dellos conciertos. Con una tirada de 1.000 exemplares; autoxestionáu dafechu y financiáu cola publicidá de chigres musicales y otros pequeños negocios; y con una perspectiva mui crítica col establishment musical, políticu y económicu; nacía esti fancín del que diben editase tres númberos: marzu de 2007, xunetu de 2007 y xineru de 2008. 

Pegatina histórica criticando al entonces presidente del Principáu

A lo llargo de les sos páxines dábase «tola información posible sobre esos grupos que nun siguen les normes comerciales, grupos de cai cuyos medios son pocos y oportunidaes menos» y apoyábase una escena asturiana «diferente ya alternativa a les modes y a les ventes». D’esta manera había noticies, reportaxes, entrevistes, reseñes de discos, axenda de conciertos y hasta llegó a facese una caricatura de Skama la Rede. Tamién tenía protagonismu l’actualidá social «pa intentar concienciar a los lleutores» y asina ye como hubo artículos sobre’l conflictu de los y les trabayadores de Cajastur o sobre los casos de represión n’Asturies, que d’aquella tuvieron muncha contestación na cai.

«Fechu n’Asturies Daquella taben naciendo grupos como Gomeru, Sambre, Spanta la Xente o Fala Non Caduca y otros como La Tarrancha, Soncai System, Skontra, Verdasca o Skama la Rede asoleyaben los primeros trabayos»

Les sos fueyes son una fotografía d’un momentu nel que taben dando los sos primeros pasos grupos nuevos de rock n’asturianu (Gomeru, Sambre, Spanta la Xente, Fala Non Caduca); nel que formaciones como La Tarrancha, Soncai System, Skama la Rede, Skontra, Verdasca, Adizión Etílika o K-Nalón asoleyaben y/o grababen los sos primeros trabayos; nel qu’había unes cuantes nueches celtes y eventos folk per tol país; o nel qu’Asturies acoyía davezu conciertos de grupos foriatos pernomaos como Sepultura y New York Ska-Jazz Ensemble o festivales como’l Derrame Rock y la Folixa del 1u Mayu qu’entamaba’l FUSOA. Destaquen tamién los reportaxes dedicaos a la música nes cuenques del Nalón y del Caudal, al rock n’asturianu o a la música xamaicana n’Asturies. Ente les entrevistes (Skontra, K-Nalón, La Col.lá Propinde…) ye d’especial interés la realizada a Miguel Rodríguez, ex componente de Puxarra, un grupu punk qu’existió ente 1989 y 1992 y que reflexa munches cuestiones d’aquella Asturies anterior a la que viviríen los y les millenials.

«Naquel tiempu la escena musical taba mui masculinaza, había poca conciencia feminista y ciertos sectores de la “izquierda alternativa” criticaben y despreciaben a la llingua asturiana»

Soníos como’l folk, metal, hiphop, rock, reggae o hardcore tuveron espaciu nesti fancín que taba maquetao por Antón Martínez -anguaño trabayador na copistería La Semeya de Noreña- y nel que collaboraron persones como Alba Estrada, Xune Elipe, Miguel Fernandi Burilo, Aique Chalaneru, David Tará, Xosé Pumuki, Félix Fernández o Héctor Torre; un reflexu de lo masculinizada que taba la escena y de la poca conciencia feminista qu’existía d’aquella. El fancín taba n’asturianu dafechu, nun contestu nel que tovía yera mui frecuente sentir crítiques y desprecios pa cola llingua’l país dende ciertos sectores de la llamada “izquierda alternativa”; un fechu qu’afortunadamente foi amenorgando col tiempu.

Anque nel tercer númberu anuncíabase que diba haber una cuartu, aportó llueu la crisis de 2008 y el so responsable convirtióse nuna d’eses «Leyendas Urbanas» de les que falaba Tini Areces al tener qu’emigrar a Bilbao pa estudiar Periodismu; lo que causó que nun s’editaren más exemplares físicos del Fechu n’Asturies. Sicasí a primeros de 2009, Xicu Ariza presentaba Fnast.net, una continuación dixital del fancín que duraría hasta primeros de 2011. Diez años dempués, aquella esperiencia foi la semiente de lo qu’en 2021 sería’l proyectu de Musicasturiana.com yá reconvertíu nel mediu de comunicación que conocemos anguaño.

// Calca equí pa lleer na Hemeroteca los númberos del fancín Fechu n’Asturies //

Númberu 1 (marzu 2007)
Númberu 2 (xunetu 2007)
Númberu 3 (xineru 2008)

Dexa un comentariu

X