Esti domingu 18 entama’l XII Concursu de Canción Asturiana Conceyu de Siero

L’auditoriu CPI de Llugones acueye esti domingu 18 a les 11.30h la mañana la primer fase del XII Concursu de Canción Asturiana Conceyu de Siero, ún de los eventos institucionales más veteranos dedicaos a l’asturianada. Pa esta edición inscribiéronse más de 60 persones dividíes en 28 homes, 9 muyeres y 12 rapazos y rapaces d’ente 10 y 21 años. Tamién hai 8 persones inscrites pa la modalidá de canción vaqueira, 9 pa l’ayerana y dos pareyes pa la de tonada dialogada.

Na primer xornada d’esti certame entamáu pol Ayuntamientu Siero, la so Fundación Municipal de Cultura y AFATRA (Asociación de Folclore Amigos de la Tradición) van participar un total de diez persones: Tatiana Suárez (Xixón), Isaac Sierra (Parres), María Luisa Martínez (Xixón), Carlos Mier (Bulnes), José Sánchez (Peñamellera), Rogelio Mier (Bulnes), Andrés Abad (Llanes) y Celestino Rozada (Llanes); amás de Mario González (Llanes) y Lucía Fernández (Villaviciosa) na estaya moza. Tatiana Suárez repite pa la modalidá de canción vaqueira y Celestino Rozada pa la d’ayerana.

Esti concursu va repartir 4.400 euros en premios: ente 50 euros y 600 euros pa los siete finalistes de caúna de les estayes absolutes masculines y femenines; 200 euros pa quien gane na modalidá de canción vaqueira y ayerana; y 300 euros pa la pareya qu’algame’l premiu especial canción dialogada Memorial “Agustín Argüelles – Diamantina Rodríguez». Amás, tolos finalistes van recibir diploma y troféu. La estaya moza ta llendada a un máximu de 22 años y diez participantes; toles persones van recibir troféu, diploma y un obsequiu. Como novedá nesta edición, esti concursu va ser clasificatoriu pal Premiu Autonómicu de Canción Asturiana que’l Gobiernu del Principáu d’Asturies va entamar esti 2024 per primer vegada.

Llugones y La Pola van ser los escenarios d’esta XII edición. Les cuatro eliminatories va facese los domingos 18 y 25 de febreru y 3 y 10 de marzu nel Auditoriu CPI Llugones, que tamién va acoyer el 17 de marzu la primer ronda de les semifinales. Les otres dos van ser el 31 de marzu y 7 d’abril nel Teatru Auditoriu de La Pola, espaciu nel que van celebrase les finales el 21 y 28 d’abril. El certame remata’l 12 de mayu cola gala d’entrega de premios en La Pola. Toles xornaes van celebrase a les 11.30 la mañana con entrada llibre, van tar presentaes por Esther Fonseca y Miguel Ánxel Montenegro y el xuráu ta compuestu por Gerardo García Tolín, Anabel Santiago y Mari Celi Fernández.