Esta selmana hai dos charres dedicaes al celtismu y al baille tradicional del oriente

Xixón y Llangréu acueyen esta selmana dos eventos qu’afonden na música y na cultura de raigañu. Esti miércoles 20 a les 20h nel Atenéu Obreru de Xixón, Lisardo Lombardía va impartir la charra El celtismu del sieglu XXI. De la reivindicación de los oríxenes al horizonte creador del interceltismu. Per otru llau, el domingu 25 el baillador y estudiosu del baille tradicional, Santi Galguera, va dar una charra-taller entitulada El baille del oriente entamada pol Grupu de Baille Tradicional L’Enguedeyu en Lada, Esta última actividá tien un preciu de 40 euros y p’apuntase hai qu’acutar plaza escribiendo a contacto@lenguedeyu.es.

Lisardo Lombardía ye una de les figures claves de la música contemporánea asturiana. Fundador de la discográfica Fonoastur, ye estudiosu de la música popular y foi durante 14 años director del Festival Interceltique de Lorient, l’eventu con más sonadía del mundu celta. Per otru llau, Santi Galguera ye un etnomusicólogu llaniscu quien tien investigao sobre’l baille tradicional nel oriente del país, especialmente sobre la xota y lo llixero, amás de pertenecer a delles asociaciones de música y baille tradicionales y poner clases d’esta manifestación cultural de raigañu.

Mercar discos folk, celta y tradicional na tienda online

Dexa un comentariu

X