Camín de Fierro zarra esti vienres en La Llaboral de Xixón les presentaciones de ‘Rock&Fierro’

En xunetu de 2021 asoleyaba en formatu físicu y en toles plataformes musicales Rock&Fierro, el segundu llarga duración de la Banda Gaites Camín de Fierro. Tres años dempués, l’agrupación pon fin a esti orixinal trabayu y espectáculu qu’amesta a una base musical rockera el soníu d’una banda de gaites; too ello con 25 músicos enriba d’un escenariu. Esti vienres 12 a les 20.30h, nel Teatru La Llaboral de Xixón, va ser el fin de «no gira» del proyectu y les entraes yá tán a la venta por seis euros.

«Rock & Fierro, ye un espectáculu que convida a disfrutar de la música dende’l primer minutu y nel que poenmos enriba l’escenariu tola nuestra esperiencia musical en compañía d’una banda de rock p’algamar un soníu propiu y innovador. Temes instrumentales y vocales, con tola presencia de la gaita y la percusión de la banda que s’entemecen y equilibren gracies a los arreglos de Sam Rodríguez, encargáu de dar una sensación d’acabáu a cada pieza». Con estes palabres presentaba l’agrupación el so segundu trabayu, qu’amás tien les collaboraciones d’artistes como Jorge Otero, Pablo Moro, Toli Morilla o Xune Elipe.

Esti discu y espectáculu yá aportó a llugares como Proaza -ún de los conceyos de los que ye esta banda, amás de los de Teberga y Santo Adriano-, o’l Festival Intercélticu de Lorient, amás d’algamar el Premio AMAS 2022 na estaya de Mejor Canción Folk con «Flacos y ensin peinar». Un proyectu destacáu el d’esta formación , pensáu p’aportar a un públicu que trescienda al propiu de les bandes de gaites o de la música celta. Esti vienres en Xixón va ser la última oportunidá pa disfrutar d’esta propuesta.

Primer discu en dixital

Amás d’esto, la Banda Gaites Camín de Fierro xubió recientemente a toles plataformes musicales el so primer trabayu 10 años nel camín. «Ye un discu que quier enseñar el nuestru trabayu diariu como banda gaites n’estáu puru, por esa razón los más de los temes tán interpretaos pola formación habitual de gaites, caxes, timbales y bombu, cola qu’aspiramos a esplotar tolos recursos espresivos que tán al nuestru algame», desplica la formación sobre esti álbum que tien collaboraciones «de luxu», nel qu’esperimenten con «otros rexistros non tan habituales» y nel versionen «tanto temes propios de gaita esportaos a otros estilos como temes d’otros estilos importaos a la gaita».