Col entamu del mes de payares vuelven a celebrase dellos destacaos eventos pa la música’l país y esti fin de selmana son trés los que coinciden nel calendariu: la XXIII Seronda n’Avilés, la Seronda en Danza de Grau y l’Amagüestu de Candás. Dende esti vienres 6 al domingu 8 van pasar pela Plaza Les Aceñes, varies ubicaciones de la villa moscona y la Fábrica d’Ortiz de Candás una montonera d’agrupaciones tradicionales y artistes venceyaos a la música’l país.
L’eventu más veteranu de toos, la Seronda n’Avilés qu’entamen Xuntanza Avilés, arranca esta tarde a les 18.30h cola actuación de la Bandina los Collaínos p’animar la Plaza Les Aceñes. A les 19h abre la carpa pa inaugurar la XXIII edición del eventu y a les 19.30h Xaréu d’Ochobre y Escontra’l Raigañu -les dos agrupaciones que formen Xuntanza- van facer una amuesa de bailles y sones tradicionales. Pa les 21h vuelven a actuar Los Collaínos pa dar pasu a les 21.30h a Leirana y a les 22.30h a Herbamora, que siguen presentando’l so discu últimu 286 Llunes.
Pal sábadu 7 la carpa asitiada na Plaza les Aceñes abre a les 12h col chigre con productos de seronda -sidra, castañes, tortos…– y la formación euskaldun Iurretako Dantzariak va tar animando la plaza enantes de la xinta popular na que va haber pote de berces y arroz con lelche. Pela tarde Olga Cuervo va interpretar el cuentu pa la reciella ‘Al abrigu los cuentos’ y el grupu vizcaínu de danza va facer otru pase a les 19.30h. Yá pela nueche, son la Bandina Os Surriantes, Los del Prau Chanu y Killaphonía quien van poner ritmu a la Nueche en Danza amestando música tradicional y electrónica.
Esti mesmu vienres tamién arranca en Grau una edición nueva de Seronda en Danza. La Banda Gaites El Gumial actúa a les 20.30 na programación ‘Serondina‘, dedicada a la reciella, na que va haber maquillaxe y pasacáis mitolóxicu, tiuvivu y xuegos tradicionales y chocolatada nel Parque San Antonio. Pal sábadu 7, Nel Villanueva va poner un taller de baille y pandereta ente les cinco y siete la tarde y dende les nueve a la medianueche actúen Leirana, Rellume y Ambás ya Ramsés. El festival zárrase’l domingu 8 col Mercáu de Seronda, tamién na Plaza L’Ayuntamientu, con talleres y demostración d’oficios tradicionales y l’amenización de l’Asociación de Folclore La Flor de Grau.
El calendariu serondiegu complétase mañana col Amagüestu de Candás. A les 17.30h actúa’l Grupu de Baille La Folixa de Carreño, el Grupu Baille San Félix y la Banda Gaites Candás peles cais de la capital carreñense. Tamién toquen a les 18.30h na Fábrica d’Ortiz, onde va poner el ramu a la xornada la Orquestina la Xarangana. Trés destacaes cites pa enllenar de música tradicional estes trés villes vecines.
Suscríbite a les nuestres novedaes
