El próximu mes de mayu va asoleyar El neñu que cuntó toles estrelles, el quintu discu de Fontoria. Pa dir anticipando lo que se va poder sentir nél, la banda piloñesa de folk progresivu asoleya güei en toles plataformes musicales «Cuntando estrelles«, el primer cenciellu d’esti álbum que Maxi Areñes, cabezaleru de la formación, presenta como «un trabayu sencillín y enllenu de simboloxíes autobiográfiques».
«Reñacer nun ye na más regresar de la muerte. Reñacer quier dicir volver a creyer, volver a tener esperanza, tirar p’alantre, renovase. El ser humanu reñaz tolos díes, nun somos los mesmos que cuando yéremos neños, avanzamos, ca ún nel so campu, dende’l neñu que deprende una pallabra nueva, hasta l’astronauta que ta investigando el cambiu climáticu dende una estación espacial. Les nueses acciones mos guíen a un nuevu reñacer y ye por ello que cada nuevu día ye una oportunidá de llevantase y de tornar a intentalo. Tenemos que seguir creando pa nun ser destruyíos…», con esti testu Fontoria desvelaba nes sos redes sociales la filosofía del discu.
Como ye vezu nos sos trabayos, la banda piloñesa va arrodiase d’una montonera collaboraciones: Vero Rubio (trompeta y trompa), Josep-María Ribelles (Harpa), Mael Martínez (Bodhran), Olivier Grenoble (Flauta) y Maximín Martínez (Narración). Amás, Maxi Areñes encárgase de la voz, guitarres clásiques, acústiques y llétriques, baxos acústicu y llétricu, lap Steel, gaita rabil, xiblates, bombarda, pianu, harmoniu, electrorgan transpositor, órganos farfisa y lowrey, sintetizaores prop. El diseñu del CD que va asoleyar en mayu ye obra de Maitetxu Isla.
Suscríbite a les nuestres novedaes
