Les islles Shetland son una de les zones con más personalidá d’Escocia, tamién nel aspectu musical, yá que ye bien conocida y reconocida la so escena, con munchos y munches intérpretes que recreen la so tradición única de violín y el patrimoniu musical bayurosu llocal. Nel añu 1981 aficionaos, músicos, patrocinadores y diverses entidaes decidieron entamar un eventu que xirara alredor de la música folk, constituyóse un comité organizador del que facíen parte un numberosu grupu de voluntarios y voluntaries, que foron quien a entamar aquella primer edición del Shetland Folk Festival y, colos años, llevalu a convertise nún de los principales alcuentros d’esti tipu de sonoridaes d’ente tolos que se desenvuelven n’Escocia y nel ámbitu celta. Esta filosofía d’autoxestión vese reflexada nestes palabres asoleyaes na páxina web del festival: «Ensin les families qu’abren les sos cases p’abellugar a los artistes, los voluntarios del Club del Festival, el Club Náuticu de Lerwick y otres persones que xestionen los bares del Club, los vendedores de rifes y productos nos llugares, el personal de les tiendes, los conductores, los comités de los salones de fiestes y la hospitalidá xeneral de les Shetland, el Shetland Folk Festival simplemente nun sería l’éxitu pol que ye famosu». A lo llargo d’estes más de cuatro décades d’existencia tienen pasao pel escenariu del festival los y les artistes más nomaos de la escena internacional de la música celta, siendo una cita obligada pa los y les sos siguidores, amás de puntu d’alcuentru de promotores y intérpretes.
La primer vez qu’un representante asturianu acudió al Shetland Folk Festival foi nel añu 2004 cola banda ribeseyana Corquiéu, qu’actuó en dellos de los escenarios colos que cuenta l’eventu, que se desenvuelve a lo llargo de varios díes. La formación d’aquellos conciertos yera: Paul Balmori (buzuqui y baxu pedal), Frankie Delgado (violín), Pablo Valdés (guitarra), David Mateos (bodhran y caxón), Gema García (voz), Diego Pangua (flauta travesera) y Rigu Suárez (gaita). Naquel tiempu namás teníen publicáu’l primer trabayu discográficu, tituláu La Barquera (L’Aguañaz, 2001), col que se dieren a conocer ampliamente nel panorama folk asturianu, y escomenzaben a salir al esterior en festivales como’l de les Shetland.
Nes actuaciones en tierres escoceses adelantaron dellos temes que diben incluyise na so siguiente grabación, ente ellos los tres («Boriada«, «Ribeseyana» y «Tubería«) qu’agora asoleyamos nel Archivu de la Música Contemporánea Asturiana (AMCA), como exemplu de lo qu’ufiertaron los músicos asturianos naquel llugar. Les interpretaciones muestren a un Corquiéu en plenes facultaes, mui seguru y con un puxu estraordinariu, abriendo camín a qu’otros artistes del país pudieren posteriormente participar nel Shetland Folk Festival.
Suscríbite a les nuestres novedaes
