L’Asociación Cultural Entaína Ribeseya organiza un añu más la Folixa la Sidre apostando pola música’l país. Dende mañana hasta’l domingu, el Campu les Rolles de Ribeseya acueye actuaciones de música tradicional, conciertos, concursos de gaita, sidra casero y escanciao, y otres actividaes venceyaes a la cultura de raigañu. El cartelu y la identidá visual d’esta edición ye obra de l’artista Nieves González. L’eventu entama mañana, xueves 3, a les 20h cola participación de les bandines Los Muiles y L’Andecha Turcipié nos Cantares de Chigre.
Les actividades del fin de selmana arranquen el vienres 4 a les 20h cola actuación de la Banda Gaites Ribeseya. Dempués del pregón de Joaquín Pajarón va haber tres conciertos, ente los que destaca’l de Girls to the Front, una banda formada por delles músiques del país como Mapi Quintana, Alicia Álvarez, Sil Fernández y Eva D. Toca. El sábadu 5 entama cola IV edición del Concursu de Gaiteros Solistes «Gelu Cuervo», pal que la inscripción yá ta zarrada. A partir de les 13.30h toquen 6 Riales y, a les 19h, el G.F. Prau Llerón y la B.G. El Gumial van compartir un pasucáis dempués de dos amueses de deportes tradicionales y llucha tradicional. Pela nueche van sonar dende les 21.30h los grupos de folk Draque, Corquiéu y Alienda, y la DJ La Güeriata pa finar la nueche.
Na mañana del domingu 6, a les 12.30h, la Orquestina La Xarangana va poner la música a la preba popular de la final del VIII Concursu de Sidre Caseru de Ribeseya. La Folixa la Sidre, una cita imprescindible pa la cultura tradicional y popular d’Asturies, que tolos años programa música’l país, va poner el ramu a esta edición col III Concursu Oficial d’Escanciadores dende les 17.30h.
La programación completa puede consultase equí:
Suscríbite a les nuestres novedaes
