Esti miércoles 6 d’agostu a les 22.30 TPA estrena Las gaitas conquistan Nueva York, un reportaxe especial que cunta la participación de la Banda Gaites Villa de Xixón nel históricu desfile de San Patriciu, celebráu’l pasáu 17 de marzu na Quintana Avenida de Manhattan. Esti eventu lleva dende 1762 celebrándose ininterrumpidamente y l’agrupación xixonesa festexó los sos 25 años de trayectoria participando nél con una delegación de sesenta persones.
Per cinco díes, un equipu de TPA acompañó a los músicos nel so viaxe a Nueva York, documentando actuaciones n’escenarios tan icónicos como’l Mercado Little Spain -del chef José Andrés- o’l Centro Español de Queens, onde conflúin les comunidaes españoles y irlandeses.
Tamién recueye’l pasu de la delegación per llugares como’l Central Park, la Estatua de la Llibertá o’l MoMA, y inclúi testimonios d’asturianos na diáspora y del voluntariáu que fai posible’l desfile más vieyu del mundu y que siguen más de dos millones d’espectadores.
La Banda Gaites Villa de Xixón algamó cola so participación nesti desfile per cuarta vez un importante reconocimientu: foi premiada como la meyor agrupación internacional y quedó na segunda posición global -d’un total de 70 formaciones participantes-, namás per detrás de la del condáu neoyorquín de Nassau. Toa esta proyección internacional de la cultura asturiana y lo que significa pal país la esportación de la so cultura, queda reflexao en Las gaitas conquistan Nueva York, obra audiovisual cola que TPA quier reconocer esti llabor.
Suscríbite a les nuestres novedaes
