La selmana pasada’l Gobiernu del Principáu d’Asturies presentaba la programación completa de los actos conmemorativos del Día d’Asturies nos que va haber una montonera d’actuaciones musicales ente’l 5 y el 8 setiembre. Sicasí, nun va ser la única programación pa festexar esti día con música. N’Uviéu, Candás y Quirós va haber más conciertos y otres actividaes entamaes por Les Pites, Meca, Aína y AMA, ente otros.
La programación entama’l domingu 7 a les 13h nos Almacenes Kuivi. Ehí va celebrase Meca, el I Alcuentru de DJs asturianos nel que van participar un total de 21 DJs de música electrónica. Anque nun va sonar música n’asturianu, la organización del eventu sí que ta faciendo la comunicación nesta llingua y afirmen nes sos redes sociales qu’entamen esti alcuentru «previu al día de la nuestra tierrina querida». Amás, l’actividá ye una apuesta por axuntar y visibilizar a la escena d’electrónica fecha n’Asturies.
El mesmu día 7, a les 19h, Les Pites entamen una Tarde en Danza en Lata de Zinc (Uviéu). «La Lata de Zinc ta d’aniversariu y nós vamos tar poniendo’l nuestru toque tradifantasía a la víespora del día d’Asturies», desplicó’l colectivu nes sos redes sociales. Amás, Les Pites faen doblete, porque’l llunes 8 a les 13.30h participen en La Pimpana de Quirós nun Vermú en Danza xunto al DJ Berni Caverni.
Pal llunes 8 setiembre’l partíu políticu asturianista Aína organiza la xornada El País Verde a los Pies na que la música’l país va tar presente con un taller de baille con Luis Ángel Fernández Santos a les 16h y una actuación de Soi Panderetera a les 17h. Dambes actividaes van ser nel Área Recreativa d’Ules (Uviéu). Tamién el colectivu políticu AMA (Asamblea Moza d’Asturies) anunció que dende les 12h va entamar una xornada nos Almacenes Kuivi d’Uviéu nos que va haber música en directo y DJs, ente otres actividaes. Sicasí, tovía nun anunció la programación.
La programación musical entamada al rodiu’l Día d’Asturies complétase en Candás. El llunes 8 a les 19.30h el Parque Les Conserveres acueye l’espectáculu Rapsodia serondiana, una obra de Xuacu Llaneza. Nél, la Banda de Música de Candás va actuar xunto al grupu de música tradicional Compañeras. Si llueve, va treslladase l’actividá a la Fábrica d’Ortiz.
Na semeya, una actividá de Les Pites.
Suscríbite a les nuestres novedaes
