El Gobiernu del Principáu d’Asturies ta acabante d’anunciar la programación completa de los actos conmemorativos del Día d’Asturies. Anguaño celébrense nos conceyos qu’integren la Comarca de la Sidra, del 5 al 8 setiembre, y rinden homenaxe a la cultura sidrera, dempués de la so reconocencia como Patrimoniu Cultural Inmaterial de la Humanidá pola UNESCO. La música n’asturianu va tar presente ente la bayura d’actividaes coles actuaciones d’Hevia, Los Berrones, Felpeyu, Skama la Rede y delles agrupaciones tradicionales.
Mercaos tradicionales, muestres de gastronomía, exhibiciones de deportes y xuegos autóctonos, actividaes infantiles, espectáculos de cai, vistes guiaes al patrimoniu históricu y natural de la comarca, talleres y propuestes pa tolos públicos dan forma a la programación que va repartise per Bimenes, Cabranes, Colunga, Nava, Sariegu y Villaviciosa. La música tamién va tar presente n’actuaciones qu’axunten a artistes d’Asturies, agrupaciones tradicionales y orquestes.
La programación de música n’asturianu entama’l vienres 5 en Vega (Sariegu) col pasucáis de la Bandina L’Emboláu (de 18h a 21h) y un conciertu a les 21.30h de Los Berrones. El sábadu 6 la Bandina L’Emboláu va percorrer les cais de Colunga dende les 12.30h y pela tarde’l conceyu de Villaviciosa concentra les actividaes. Rescampla que munches d’elles tán feches en collaboración col Festival Internacional de la Gaita de Villaviciosa (FIG) y asina ye como comparten programación un pasucáis (17h) y un alcuentru (19h) con toles bandes de gaites participantes nesti festival; amás de los conciertos de Felpeyu y Skama la Rede, a los que se suma ún d’Hevia. Estes actuaciones son nel Parque del Pelambre dende les 22h.
El domingu 7 los hermanos Rodrigo y Andrea Joglar van facer un pasucáis per Santolaya (Cabranes) dende les 12h la mañana y, pela tarde, los actos treslládense a Bimenes. De 18h a 21h Los Yerbatos y La Pandorga van facer l’animación musical per Martimporra y tamién nesta llocalidá va haber un eventu de canción asturiana a les 19h. Los actos zárranse’l 8 setiembre en Nava con un alcuentru colos coros de la Comarca de la Sidra – a les 13.15h ma Ilesia de San Bartolomé- y con un pasucáis de la Banda Gaites Llariegu de 12.30h a 16h.
Na rueda prensa de presentación de los actos, la conseyera de Cultura, Vanessa Gutiérrez, destacó que “el Día d’Asturies ye la gran fiesta d’alcuentru de les y los asturianos: conmemoramos lo que somos y lo que proyectamos al mundu. Amás, anguaño facémoslo poniendo en valor la cultura sidrera y la collaboración ente conceyos”.
Nesti sentíu añedió que “esti modelu itinerante y compartíu refuercia la cohesión territorial: cada conceyu apurre la so personalidá y, xuntos, texemos una programación abierta a families, residentes y visitantes que disfruten de les nuestres tradiciones, el nuestru patrimoniu y la nuestra música”.
VIENRES 5. SARIEGU
SÁBADU 6. COLUNGA.
SÁBADU 6. VILLAVICIOSA.
DOMINGU 7. CABRANES.
DOMINGU 7. BIMENES.
LLUNES 8. NAVA
13.15h. Alcuentru colos coros de la Comarca de la Sidra (Ilesia de San Bartolomé)
12.30h a 16h. Pasucáis de la Banda de Gaites Llariegu
Suscríbite a les nuestres novedaes
