La Casa de Cultura d’Avilés acueye esti xueves 19 de marzu a les 17.30h la mesa redonda Asturies, muyeres y movimientos. Nella, la protagonista va ser l’artista llangreana Marisa Valle Roso y xunto a ella intervienen la periodista Aitana Castaño, la presidenta de la Tertulia Feminista Les Comadres Begoña Piñero Hevia y la veterana militante feminista Maricusa Argüelles. La entrada ye llibre hasta enllenar l’aforu.
Esti alderique enmárcase dientro de les actividaes rellacionaes col trabayu nuevu de la cantautora y intérprete d’asturianada, Cenicientes. Nél, recueye diez cantares qu’entemecen el folk col pop y los instrumentos electrónicos xunto a unes lletres que son un cantu al feminismu, a la llucha pola xusticia social y a la reivindicación de la memoria colectiva asturiana y de la so identidá.
Marisa Valle Roso ta xirando per tol Estáu español con esti trabayu y la próxima parada del tour va facela en casa. El vienres 27 de marzu a les 21h actúa na sala Tribeca Live d’Uviéu, nun show que destaca porque va ser una oportunidá pa sentir a l’artista llangreana nuna sala de conciertos, un espaciu nel que nun ye mui común vela actuar; al facelo davezu en teatros o n’eventos al aire llibre. Les entraes anticipaes yá tán a la venta por 18 euros.
Suscríbite a les nuestres novedaes
