Siguen los eventos en Xixón nos que lliteratura y música asturiana caminen de la mano. Esta selmana continúa’l festival de poesía POEX y, dientro de les actividaes programaes, hai el xueves 19 una conversación ente los cantautores Xaime Martínez y Nacho Vegas. Amás, de vienres a domingu celébrase La FEA (Feria de la Edición Asturiana) y nella van tar el sábadu componentes de Pop Piquiñín firmando el so últimu llibru-discu y falando d’él.
Xaime Martínez ye una de les voces más singulares de la creación asturiana contemporánea qu’él materializa cola so obra lliteraria –ye Premio Nacional de Poesía Joven Miguel Hernández y autor de dellos llibros-, cola so carrera musical -primero nel grupu La Bande, llueu en solitario-, y a traviés de la edición cola editorial que fundó y coordina, Cierva y Culiebra. El xueves 19 a les 18h na cafetería Toma 3 va facer una llectura de la so obra última, Pábilun, y nella va tar acompañada de Nacho Vegas, una de les figures clave de la canción d’autor estatal. A lo llargo de la so trayectoria, Vegas foi incorporando l’asturianu a la so obra musical con cada vez más presencia, sumando una montonera de cantares nesti idioma y reforzando’l diálogu ente poesía contemporánea y canción.
D’otra banda, el fin de selmana’l Muséu del Ferrocarril de Xixón acueye la IV Feria de la Edición Asturiana (La FEA). La editorial y discográfica La Fabriquina va tener un puestu de venta y componentes de Pop Piquiñín van tar firmando y presentando’l so trabayu nuevu Pop Piquiñín. Una escoyeta de les canciones n’asturianu de Petit Pop. L’actividá va ser a les 13h y, mesmo que la del POEX, tien entrada llibre.
Suscríbite a les nuestres novedaes
