El Grupu Folklóricu Blimea entama un magüestu pal 23 y 224 d’ochobre

El Magüestu de Blimea va celebrar la so tercer edición el 24 d’ochobre con una programación ampliada y dos conciertos nocherniegos, a cargu de Leirana, Irish Treble y Ringorrango. La cita, entamada pol Grupu Folklóricu Blimea col sofitu del Conceyu de Samartín del Rei Aurelio, va treslladase al patiu del C. P. El Parque, con entrada xunto al Polideportivu Alejandro Carrucha, pa disponer d’un espaciu más ampliu y abrir l’actividá a más públicu.

La organización esplica que l’ampliación respuende a la bona acoyida de les dos primeres ediciones. «Los dos primeros años, sobre too’l primeru, fueron eventos más íntimos, pero vista l’acoyida, pa esti terceru quiximos facelo más abierto». La primer convocatoria cuntó con una pareya estremeña que compartió bailles y cantares de la so tierra, mentes que nel segundu añu la apuesta foi pola música de Vanesa Muela. Agora, el programa incorpora dos formaciones del folk y la música tradicional. «Pa esti añu van venir dos grupos de los grandes del folclor nacional, como son Irish Treble, pa salinos un pocu de la tradición nuestra y abrir fronteres, y Ringorrango p’acabar la folixa como tal», señalen dende’l grupu.

Les actividaes van entamar el vienres 23 cola celebración d’una Nueche en Danza, que va rematar con sopes d’ayu. El sábadu 24, la apertura al públicu va ser a les 12:00 hores, con una sesión vermú de Leirana a les 13:00, el proyectu de Nel Villanueva que fai un percorríu pela música tradicional asturiana afaciéndola pal baille. Pela tarde, a les 17:00, la compañía Los Pintores va ufiertar teatru pa neños y adultos, y a les 18:00 Irish Treble va impartir un taller de danza irlandesa de baldre y abiertu a toles persones interesaes. La formación va actuar dempués nel conciertu de les 21:00 hores, antes de que Ringorrango ponga’l puntu final a la xornada a les 22:30.

El Grupu Folklóricu Blimea busca consolidar asina una convocatoria que xune música, danza y convivencia alredor d’una tradición venceyada al ciclu d’ellaboración de la sidra. «L’oxetivu nun ye otru que’l disfrute de la xente nuna actividá tradicional y tan nuestra como ye la primer xuntanza que se fai alredor de la sidra a lo llargo del procesu d’ellaboración de la mesma, el magüestu», destaca la organización.