Gates Ximielgues estrena los sos dos primeros cenciellos, una primer publicación na que’l dúu pon en xuegu la composición propia y la reinterpretación de la música tradicional asturiana. Los dos temes grabáronse na Fábrica de Músicos, n’Avilés, con Rubén Álvarez, músicu col que les integrantes del proyectu caltienen una rellación d’amistá y collaboración dende hai años. Los títulos d’estos dos cenciellos, que yá tán nes principales plataformes, son ‘Tangu caprichosu’ y ‘Que cuándo quies’.
Los cenciellos amuesen les dos vertientes d’una propuesta que parte de mundos musicales distintos y que busca precisamente esplorar esi contraste. Unu de los temes ye una composición propia, con lletra d’Ámparo y arreglos de la otra integrante del dúu, Tina; l’otru parte d’un cantar recoyíu nel cancioneru tradicional, que Gates Ximielgues adapta con un arreglu propiu. «Venimos de dos mundos completamente distintos», esplica’l dúu, que define’l so trabayu como un esperimentu musical nel que conviven los cantares orixinales y les pieces tradicionales llevaes al so tarrén. L’asturianu funciona como llingua vehicular d’un proyectu que nació de la esperimentación con versiones de cantares poco habituales y que foi evolucionando hacia la composición propia y la música asturiana.
La grabación d’estos dos primeros temes sirvió tamién pa comprobar cómo funcionaba’l soníu del dúu nun estudiu profesional. La intención, según cuenten les integrantes, yera consiguir un resultáu «guapu, curiosu y llimpiu, col que poder escuchar los cantares tal como los imaxinaben».
Gates Ximielgues nun da por zarrada esta primer etapa: el dúu sigue trabayando en material nuevu y tien otros dos temes en mente pa una próxima grabación, amás de más cantares en procesu. La idea ye siguir avanzando pasu ente pasu, alternando creación propia y arreglos de repertoriu tradicional dende una perspectiva personal y ensin perder el gustu por esperimentar.
Suscríbite a les nuestres novedaes
