Skama la Rede y Ochobre van ser dos de les protagonistes de los conciertos del Aniverfest 2026, la celebración del séptimu aniversariu de La Raposa. La cita musical va tener llugar el sábadu 24 d’ochobre, a partir de les 19.00 hores, nel espaciu Kuivi d’Uviéu, con un cartel que va axuntar seis bandes y que va tar presentáu por Pedro Durán.
Les dos formaciones asturianes van compartir escenariu con Pubic Enemy, Tobogán, Dakidarría y Mefritos and the Gimme Cheetos. Skama la Rede y Ochobre repiten na programación del aniversariu, mientres que los otros cuatro grupos van participar per primer vegada. Los conciertos van ser la única actividá de la celebración pa la que va ser necesario mercar entrada, que lleven escosaes dende va selmanes.
La programación del sábadu va entamar pela mañana nel Kuivi, a les 12.30 hores, con un tornéu de fútbol 3 organizáu por MDM Pro 2026. Mientres se desenvuelve la competición deportiva, el públicu va poder visitar un mercáu de creadores con productos y propuestes de distintes estayes. La xornada va siguir a les 17.00 hores con un alderique sobre cómo combatir el fascismu dende’l movimientu obreru, nel que van participar persones que la organización va anunciar más alantre.
L’aniversariu va entamar el vienres 23 d’ochobre con una nueva edición de la fiesta de La Raposa, a partir de les 18.00 hores. La celebración va siguir dende les 20.00 hores cola música de Dj Avante’l Pueblu, antes del pieslle del llocal a les 00.30 hores. La fiesta va treslladase entós a El Chicote, onde dende la 01.00 hores va celebrase una sesión de drum and bass de la mano de Jarrera Klubb, con Lilakk y Skiat.
Suscríbite a les nuestres novedaes
