Otru añu más la capital de Carreño vuelve a ser l’escenariu de los soníos de raigañu asturianu y d’otros países del Arcu Atlánticu gracies a la XIII Nueche Celta de Candás y al XXIX Festival de Bandes de Gaites Villa de Candás. Los dos eventos coinciden nel mesmu fin de selmana y tán acabante d’anunciar la programación: nel primeru actúen Ca Beleño, Skama la Rede y los gallegos Ailá; mentanto que nel segundu participen delles agrupaciones de dientro y fuera d’Asturies y hai otres actividaes como mercáu tradicional, talleres y concursos.
Los díes 23, 24 y 25 de xunetu celébrase’l XXIX Festival de Bandes de Gaites Villa de Candás. Nesta edición actúen la Banda Gaites Villaviciosa – El Gaitero, la Banda Gaites Candás, la Bandina d’Escolinos de la BG Candás, Los Gascones y la Orquestina La Xarangana; amás de les formaciones internacionales Kevrenn Arlé (Bretaña) y Banda de Gaitas e Percusión A Insua de Caldelas (Galicia). Tamién va celebrase’l Concursu de Pareyes de Gaita y Tambor “Memorial Diego Alonso” y el Concursu de Cuerpos de Percusión, pa que quien tenga interés en participar puea apuntase enantes del 21 de xunetu.
D’otra banda, la nueche del vienres 24 de xunetu la villa acueye la XIII Nueche Celta de Candás. Nesta edición l’eventu vuelve apostar pol rock n’asturianu -daqué que nun asocedía dende que’l Conceyu Carreño recuperara la cita hai trés años- col conciertu del grupu ska-punk Skama la Rede. Tamién actúen Ca Beleño, banda que tien ente los sos integrantes a veteranos de la escena como José Ángel Hevia, Pepín de Muñalén o Frankie Delgado y que tien l’oxetivu de «entemecer l’espíritu del folk tradicional cola intensidá del rock«. Pela parte gallega toquen Ailá, una de les formaciones de música tradicional más reconocíes del país vecín. Too ello va ser nel Parque Les Conserveres dende les 23h y con entrada llibre.
Suscríbite a les nuestres novedaes
