Alfredo González llanza videoclip cola collaboración d’el Coru Mineru de Turón y Nacho Vegas
Coincidiendo col 91 aniversariu de la proclamación de la II República Española, Alfredo González asoleyó’l videoclip “Si te pregunten por mí“, el primer adelantu del so EP “Asuntu de Fe”. Nun ye casualidá la fecha escoyida, yá que la melodía ta basada nel cantar popular de la Guerra Civil Española “Si me quieres escribir”, anque con una nueva lletra que reivindica la llucha obrera de Turón, llocalidá d’onde ye esti cantautor. Esti tema -que yá ta tamién en toles plataformes dixitales– garra más fuercia tovía gracies a dos collaboraciones mui destacaes: la del cantautor xixonés Nacho Vegas y la del Coru Mineru de Turón.
La pieza ye ún de los cuatro temes que van formar “Asuntu de Fe”, el próximu trabayu dafechu n’asturianu d’Alfredo González, qu’editará esti 2022 Algamar Producciones. L’EP va suponer la publicación dempués d’once años d’un trabayu discográficu interpretáu únicamente n’asturianu per parte d’esti reconocíu músicu. La última esperiencia foi ‘Dobleces‘, doble CD que González firmó xunto col escritor Pablo Texón, anque pel mediu el músicu sí que trabayó na llingua autóctona componiendo p’artistes como Silvia Quesada, Muyeres, Alienda… y llanzó’l cantar “Pentotal” nel so anterior discu ‘Afluentes’.
Alfredo González ye ún de los cantautores actuales más reconocíos de la escena asturiana. La so carrera entamó en 2001 y pasín a pasu foi faciendo camín con 6 discos nos que suena una canción d’autor influyía pol rock o l’indie. Ente la so discografía rescampla ‘La Nada y Tu’, del añu 2009, que ta n’asturianu dafechu y que ye’l más gallardonáu, con premios como’l Meyor Cantar en Llingua Asturiana o’l Premiu de la Crítica RTPA al Meyor Discu d’Autor. Tienen collaboráu con esti artista escritores de sonadía como Pablo Texón o músicos como’l reputáu Quique González, que llegó a cantar n’asturianu nun tema. Esti 2022 llanzará dos EP, ún en castellanu, ‘La Insistencia’, y el mentáu n’asturianu, ‘Asuntu de Fe’.
