Güei entama en Siero la XLI Selmana del Folclore Astur
Dende esti llunes 18 y hasta’l sábadu 23 d’abril, La Pola Siero va enllenase de conciertos folk, baille tradicional, teatru costumista y hasta un alcuentru d’escueles de música tradicional. La programación forma parte de la XLI Selmana del Folclore Astur qu’entama’l Grupu Folclóricu El Ventolín de Siero y qu’entama güei a les 20h cola inauguración institucional de la Selmana y l’actuación de les Pandereteres de Fitoria na Sala de Cámara del Auditoriu de La Pola.
Mañana, p’acompañar a la mítica festividá de los Güevos Pintos de La Pola, el Grupu Folclóricu El Ventolín participa nel tradicional desfile que va percorrer les cais de La Pola ente les 12 y les 17h y el miércoles, a les 20h, el Grupu de Teatru de Carbayín va interpretar la obra “Yá somos democráticos” na Sala Principal del Auditoriu.
La música tradicional reellaborada va garrar el protagonismu nos dos díes siguientes. El xueves 21 a les 20h la Sala de Cámara del Auditoriu de La Pola acueye’l conciertu “Cantares de… y pa neñ@s“ de Fernando Valle Roso y Silvia Moreno, mentes que’l vienres 22, a les 20.30h y na Sala Principal del Auditoriu, Baxel van presentar el so primer discu, ‘El Cantar del Simpatías‘, nun formatu especial nel que van tar convidaos Xosé Ambás a la voz, Pepín de Muñalén a les flautes, Richard García a los teclaos y David Varela al curdión.
I Alcuentru d’Escueles de Música Tradicional
Les xornaes rematen el sábadu 23 col I Alcuentru d’Escueles de Música Tradicional. Nelles va participar l’alumnáu de les escueles de Fitoria, La Villa, Tinéu, A Mansalva y El Ventolín nun actu presentáu por Esther Fonseca que va entamar a les 19h na Sala Principal del Auditoriu de La Pola Siero. Cola cellebración de la edición númberu dieciséis d’esta Selmana, el Grupu Folclóricu El Ventolín de Siero sigue calteniendo’l so llabor de dinamización y espardimientu nel so conceyu de la cultura tradicional del país.
