Llega un fin de selmana d’esos nos que tenemos qu’escoyer, otra vegada más. Ye un fin de selmana que destaca por tres eventos de pesu na escena tradicional y folk: El Cachu Fest en Degaña, y les Xornaes del Vigulín y l’Alcuentru Folclor de L’Infiestu.
El Cachu Fest llega esti añu con un programa qu’axunta estilos estremaos dientro de la reellaboración de música tradicional. Dende Galicia, lleguen Alana, De Ninghures y Breo, dende Asturies, Llevólu’l Sumiciu, Picarós, Abéu, y Guieldu, y dende Valladolid, Dulzaro. Amás, el festival cunta con delles actividaes a mayores programaes pal sábadu 20, como son un conciertu acústicu de Rellume, una cata de vinos y quesos DOP, un taller de baile tradicional impartíu por Santi Galguera, una visita a la Guarida del Cunqueiu, una visita al muséu Tixilero, una esposición nomada «En el Umbral del Olvido», y narración oral con David Acera. Ye necesario acutar plaza.
Les Xornaes del Vigulín, pela so parte, ufierten esti añu la presentación de dos libros alrodiu’l vigulín tradicional, en Asturies y Galicia. Alexandre Cadarso va tar presentando ‘Co violino ao carrelo’ na Casa de Cultura de L’Infiestu a les 17.00, abriendo les Xornaes, y dempués, Marta Fernández, xunto a Eduardo Viñuela y otros collaboradores, van presentar ‘El vigulín n’Asturies’. A les 20.00h entamen los conciertos de folk: Jacky Molard y Jean-Michel Veillon a dúu, y Corquiéu, ambos en La Benéfica. Pa les 23.00h, dempués de los conciertos, va facese sesión de folk nel chigre La Traviesa.
Al día siguiente, el sábadu, Jacky Molard y Jean-Michel Veillon van tar poniendo cursos de vigulín y flauta. Coincidiendo nesti día, va cellebrase en L’Infiestu el tercer Alcuentru De Folclor, qu’entama en la Plaza del Ayuntamientu a les 12.00h, con participación abierta y la presencia de los grupos La Cuadrilla de Lorca (Lorca, Murcia), Caldo & Os Rabizos (Occidente de Asturias), La Ronda la Mijiriega (Villanueva de la Vera, Cáceres) y La Cuadrilla de León (Castilla y León). Pela tarde, a les 20h, hai escenariu llibre en La Benéfica, y a les 23.00h, sesión folk en La Traviesa.
Pasando al domingu, ufiértase un taller d’iniciación al vigulín asturianu impartíu por Dolfu R. Fernández, una sesión d’educación musical temprana con Proyecto Concertino y un taller de baille y vigulín que van poner Luis Ángel Fernández y Rubén Bada. Amás, va facese’l tradicional Alcuentru de vigulín asturianu na Residencia.
Suscríbite a les nuestres novedaes
