El discu nuevu de Marisa Valle Roso yá ta dafechu en tiendes y en plataformes musicales. La cantante llangreana suma asina’l so cuartu discu d’estudiu, que lleva por nome Cenicientes y que quier ser una hestoria de les que nun s’escaecen y que pon como protagonista a les muyeres y les sos reivindicaciones a lo llargo, sobre manera, de la segunda metá del sieglu XX: los sos derechos y la semiente del primer movimientu feminista n’España.
Cenicientes fórmenlo diez cantares qu’entemecen el folk con el pop y los instrumentos lletrónicos qu’apaecen na gran mayoría de los sos temes, asitiando esta obra nueva en dalgo innovador y fresco pa la música de l’artista, pero tamién d’Asturies. D’esta manera, Valle Roso canta a les muyeres del carbón o al Tren de la Llibertá, pero tamién afonda no más personal, dedicando’l so espaciu a la salú mental, el gran problema de la sociedá del sieglu XXI. En definitiva, un cantu al feminismu, la llucha pola xusticia social, la reivindicación de la memoria colectiva asturiana y de la so identidá. Too ello failo cola ayuda del productor Juan de Dios, nomináu en delles ocasiones nos Latin Grammys y del que Marisa destaca que «supo sacar lo meyor de mí».
Esti álbum, qu’entamó a crease va un par d’años tuvo un procesu llargu y nel que l’artista «nun llograba escribir cantares que me representaren hasta qu’empecé a observar lo qu’asocedía al rodiu de mi». Asina, centróse na identidá y lo que fixo moldiar la de so: la so hestoria, la tierra na que vive y les muyes que viven nella. El primer tema que surdió foi ‘Cenicientes del carbón’, y precisamente elles dieron nome al discu y al restu de les hestories que lo conformen: «muyeres», reivindica. Ye, precisamente’l símbolu de la llucha, el zapatu d’Anita Sirgo, lo que da imaxe a tol álbum.
«Tamién afonda no más personal, dedicando’l so espaciu a la salú mental, el gran problema de la sociedá del sieglu XXI. En definitiva, un cantu al feminismu, la llucha pola xusticia social, la reivindicación de la memoria colectiva asturiana y de la so identidá»
L’artista llangreana vien dende’l mes de febreru asoleyando hasta 7 de los temes que componen esti discu y agora, cola so espublización, apaecen trés cantares más nos qu’hai «esperimentación col foclor, nuevos ritmos y un cantar inspiráu na tradición oral asturiana que lleva por nome ‘La tormenta'», desplica. Amás, destaca como «un verdaderu regalu de la vida poder conocer a la informante ya incluyila nel videoclip del cantar gracies al trabayu de Xosé Ambas y Ramses Ilesies».
Marisa Valle Roso va presentar Cenicientes con una xira pa los próximos meses pel restu del estáu español, pero hai una fecha marcada nel calendariu asturianu pa poder sintila: el 18 d’ochobre. Va ser nel Teatru Nueva de La Felguera nun conciertu que la propia artista promete que va ser mui especial.
Autora ya intérprete de la so propia hestoria, la so carrera empecipia na tonada asturiana, disciplina que marcó los sos primeros discos y valió-y reconocencies como’l premiu al Meyor Cantar Asturianu del Añu o’l Premiu de la Crítica RTPA. La so proyección nel estáu afítase cuando en 2014 ye convidada por Víctor Manuel a la so xira 50 años es nada, compartiendo escenariu con figures como Silvia Pérez Cruz, Jorge Drexler, Joaquín Sabina o Estopa.
Con una esmolición artística constante, Marisa esploró distintos xéneros y sonoridaes, como amuesa nel discu Consciente (2017), con collaboraciones de Rozalén y Víctor Manuel, y premiáu col Premiu AMAS al Meyor Cantar Folk. En 2022 llanza Lo Fugaz, el so primer trabayu íntegramente como compositora, onde la lletrónica y los tintes pop s’entemecen col folclor, ampliando’l so universu sonoru y poéticu.
En 2023 foi nominada al Premiu Camaretá al Meyor Cantar por ‘Tonada’, y en 2024 punxo música al documental Dans les Asturies, les mines ont uni les hommes, una producción cultural d’Arte.tv. Esi mesmu añu participó nel nuevu himnu Asturias de Víctor Manuel, con artistes como Nacho Vegas, Leticia Baselgas y Chus Pedro, nuna producción de RTPA con Paco Loco.
Suscríbite a les nuestres novedaes
