Avilés acueye esti sábadu la gala del XIII Premiu Camaretá al Meyor Cantar, con entrada de baldre
Esti sábadu 27 de payares a les 22.15h el Centru Niemeyer d‘Avilés va acoyer la gala del XIII Premiu Camaretá al Meyor Cantar. Nella van sonar en directo los cuatro cantares finalistes de la edición d’esti añu: “Tomasín” de ¿Aú?, “Flacos y ensin peinar” de la Banda Gaites Camín de Fierro, “El que conoz a tierra” -escrito en senabrés, variante del asturllionés de la zona de Sanabria, en Zamora-, de Carla Armas y Rubén García y “Veis Volver” de L-R. Amás va actuar Rodrigo Cuevas, ganador de la edición del añu pasáu con “Rambalín“.
La entrada a la gala ye llibre y gratuita hasta enllenar l’aforu del auditoriu. Les entraes y puen acutase na web del Centru Niemeyer, na taquilla del Centru Niemeyer d’Avilés, en Llaboral Ciudá de la Cultura (Xixón) o nel Centru d’Información Turística del Principáu d’Asturies (Uviéu). Amás, esti añu la TPA va retresmitir la gala en directo na que, tres les actuaciones de los finalistes y el conciertu de 25 minutos de Rodrigo Cuevas, va anunciase’l cantar ganador y va facese entrega d’un troféu a los sos intérpretes. El premiu tien una dotación de 6.000 euros y incluye la realización d’un videoclip, asina como la promoción y divulgación del cantar ganador nos medios de comunicación y nos eventos entamaos o promovíos pol Gobiernu del Principáu d’Asturies.
En 2007 el Gobiernu del Principáu d’Asturies creó’l Premiu al Meyor Cantar. Con 12 ediciones cellebraes, esti gallardón vien reflexando la vitalidá y la diversidá de la música fecha nes llingües autóctones d’Asturies. Pel so escenariu, pasaron más de 50 artistes y sonaron estilos musicales tán estremaos como la canción d’autor, el folk, el rock, la tonada, el reggae o’l funk. Dende l’añu pasáu, la Conseyería de Cultura, Política Llingüística y Turismu rebautizó a esti gallardón como’l Premiu Camaretá al Meyor Cantar -n’homenaxe al colectivu Camaretá fundáu en 1975 por músics y escritores del Surdimientu- y situólo al mesmu altor que’l de los otros premios lliterarios qu’entama.
