Nel añu 2020 nacía na Radio de la Universidá d’Uviéu Héroes Ensin Nome, un programa col oxetivu de promover y d’esparder propuestes y proyectos culturales que surden n’Asturies al traviés de podcasts onde s’analiza y se debate colos autores. Pelos sos micrófonos pasaron xente de la música asturiana como Silvia Quesada, L-R, Abéu, Ochobre, Misiva -grupu autor del cantar «Héroes ensin Nome», del que’l programa garra’l so nome-. o Xicu Ariza de musicasturiana.com.
El pasáu vienres 19 dende’l programa entamaron una campaña de crowdfunding pa poder facer posible la so segunda temporada, na que prometen interesantes entrevistes, debates, charres y programes esclusivos. Al traviés de les diferentes recompenses de la campaña, los organizadores d’esti podcast cultural -los estudiantes Yedra Riesgo y Raúl Alonso y el realizador audiovisual David Quesada– ufierten camisetes diseñaes pol artista Elduayen Radikal Art, posibilidá d’entrugar a los entrevistaos, posibilidá d’asistir a les grabaciones de los programes y delles xeres más, que recueyen na so plataforma de Verkami.
Amás del crowdfunding, Héroes Ensin Nome tien el patrociniu de delles empreses -como MUSICASTURIANA.COM- que sofiten esti proyectu cultural desendolcáu por xente mozo. Hasta que pase la campaña de crowdfunding y, si ye exitosa, puea entamar la segunda temporada del programa, pueden vese y sentise tolos capítulos del programa na so canal de YouTube, o en Spotify.
Suscríbite a les nuestres novedaes
