Axenda del 26 al 28 de setiembre

Entama un fin de selmana d'eventos variaos, como la presentación d'un discu, xornaes d'estudiu, muestra de traxes tradicionales y dellos conciertos

Eventos

Aporta un nuevu fin de selmana y dende musicasturiana.com vamos facer un repasu a l’actividá musical que va haber estos díes n’Asturies.

Entamamos el vienres 26 en L’Infiestu. Xusto una selmana dempués de les Xornaes del Vigulín y del Alcuentru de Folclor, Rubén Bada va presentar el so primer discu en solitariu a les 20.00h en La Benéfica. Les entraes pueden sacase por internet, o compráse ellí direutamente.

Al día siguiente, sábadu 27 a les 13.00h, hora’l vermú, entama en Llaviana ‘El Guateque Vitorina’. El Restaurante La Pumará, n’El Condáu, va acoyer esti eventu que se presenta como la primer actividá dientro de la programación del Argayu Fest. Ellí van tar tocando Tania Pereira, Ferla Megía, Zahira, Cris Bardio, los Rodríguez del Límite, Maribel & Sebastián y Volantazu DJ.

Tamién el sábadu, L’Asociación Escontra’l Raigañu entama una edición nueva de les Xornaes d’Estudiu, esti añu col títulu ‘El folclore del centru d’Asturies. Pasáu y presente‘. La programación entama a les diez de la mañana cola Introducción al repertoriu de bailles de Centru que va impartir Fernando de La Puente, profesor de baille, danza tradicional y investigación aplicada na Escuela de Música Tradicional d’Uviéu. De 12.30h a 14h el componente d’Andecha Folclor d’Uviéu, Sergio Velasco, va afondar en La práutica de la ‘jota’ y, tres d’una posa pa xintar, de 16h a 18h va centrase en La práutica de lo llixero y de la muñeira. La programación zárrase Acompañamientos rítmicos nel repertoriu de bailles del Centru, al cargu de Ramsés Ilesies, profesor de baille y percusión en delles escueles de música tradicional y responsable, xunto con Xosé Ambás, nel ATOAM.

Esa mesma nueche, a partir de les 21.00h, podemos esfrutar tamién de Picarós y d’una nueche en danza entamada por Pau Santirso y María Vázquez en La Plaza, en Teberga, dientro de les IX Xornaes de Patrimoniu Cultural.

Y yá pa zarrar el fin de selmana, el domingu 28 va a cellebrase en Grau una nueva edición de ‘Indumentaria’: Concursu y Muestra de traxes tradicionales asturianos. La xornada va entamar a les 11.00h delantre l’ayuntamientu, con xuegos pa neñes y neños col grupu Prau Llerón, y va haber mercáu, cola Banda Gaitas Conceyu de Grau amenizando. A les 13.00h, entama ‘Indumentaria 2025, Concursu y Muestra de traxes tradicionales asturianos’, cola música d’Octavio Trapiella y Dolfu Fernández. N’acabándose va armase una danza na plaza l’Ayuntamientu con toles persones que vistan traxe’l país. Yá pela tarde, a les 17.00h, na Plaza’l Mercáu, va haber baille asturianu coles actuaciones de Ramsés Ilesies y Xosé ‘Ambás’, La Flor de Grau, Roge Feito y Clarita Braña, Sergio Catalán y Lolo Catalán, Rellume, Muyeres por Grau y Santi Galguera cola collaboración del Grupu Etnográficu l’Oriente.

Tamién el domingu, a eso de les 18.00h, entamen les sesiones lentes de folk n’El Esperteyu, n’Uviéu, pa tol que quiera averase a la música folk y tradicional d’una manera cencialla ya entretenía.