Yá ta disponible en Bandcamp el nuevu trabayu discográficu de Rubén Bada. Con nome homónimu, el músicu llanza un discu ‘tripartitu’. Tres seiciones integren esta novedá: Guitarra, Vigulín y Cantares. Ca una fae referencia a tres ámbitos, tres óptiques dende les que Bada mira lo que ye’l folk y la música tradicional.
En ‘Guitarra’ alcontramos seis cortes con pieces interpretaes en xéneru instrumental col so instrumentu principal, emplegando’l so estilu de ‘fingerpicking’ col que ya venía trabayando n’otros tantos proyectos. ‘Vigulín’ son cuatro cortes nos que mos ufierta pieces mui lligaes a la tradición del baille: xotes, muñeres, agarraos, etc., dalgunes tradicionales, otros de composición propia. ‘Cantares’ ye la parte dedicada a les coples y les melodíes tradicionales y populares, de chigre, pal baille, de tonada… Les igues d’estos temes son ocho ayalgues qu’amuesen quiciabes la visión más personal del músicu sobre estos repertorios.
Amás, Rubén va tar presentando’l discu güei, vienres 26 de setiembre en La Benéfica, en L’Infiestu, a les 20.00h. Les entraes tan disponibles online y físicamente en La Benéfica.
Suscríbite a les nuestres novedaes
