La Banda Sonora de Rubén Bada

Rubén Bada (Gozón, 1978) ye ún de los músicos más valoraos de la música asturiana, y ún de los pocos que se dediquen profesionalmente y dafechu a ello. Anque nació n’Avilés, criose ente Cardo (Gozón), Priendes (Carreño) y Corvera. Toca’l bouzouki, el vigulín, la guitarra y percusión tradicional. Entamó’l so camín nel folk con Xéliba y, más tarde, formó’l tríu de cámara DRD con Diego Pangua y Dolfu R. Fernández. Tamién tocó con Dixebra, Alfredo González y más formaciones. Anguaño collabora en dellos proyectos internacionales del xéneru como Celtic Odyssée -que se presenta esti sábadu nel Teatru de Lorient- y esplora otros horizontes siendo la metá del dúu de post-folk L-R; como músicu na xira en directo de Rodrigo Cuevas; poniendo voz y instrumentos en Calea xunto a Leti Baselgas y Silvia Quesada; y tocando a la clase obrera con Mapi Quintana en Working Class.

Con él siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Sienti la playlist La Banda Sonora de Rubén Bada

Un discu qu’enxamás canses de sentir.

Buf, nun sabría dicivos porque a estes altures de la vida tengo enforma discos “de cabecera”. Au-delà… de Gwerz, Words and Music de Planxty, Prodigal Son de Martin Simpson, el primeru de los Stray Cats o’l Songs the lord tought us de The Cramps, London Calling de los Clash, L’otru llau de la mar de Llan de Cubel… nun sé, tengo tantos discos que suenen en bucle…

Si tuvieres que formar parte d’otru proyectu musical, ¿cuál sería?

¿¿¿¿Otru más???? Pues fuera coñes, la verdá que tengo una suerte que nun la merezo, en serio. Puedo presumir de tener tocao con xente maraviyoso, no musical y, sobre too, no personal. Lo que más me prestaría ye ver xente mozo ocupando los espacios y faciendo coses cola mesma ilusión que teníemos nosotros con venti años.

Pero si dalgún día se diera’l casu, “Bombón de la Ibense” ye’l grupu nel que quiero xubilame.

«Lo que más me prestaría ye ver xente mozo ocupando los espacios y faciendo coses cola mesma ilusión que teníemos nosotros con venti años»

De los cantares que compusisti o interpretes, ¿cuál ye’l to preferíu?

Pues toi particularmente arguyosu de ‘Anda neña’, que toco con L-R. Igual tengo coses meyores, pero esti amosa bien enforma como me siento con esti proyectu y cola escena nestos caberos años.

¿Cuándo foi la primer vez que xubisti a un escenariu y que pasó enantes, durante y depués?

Quitando les “funciones” del cole y dalgún “conciertín” pela cai, la primer vez que xubí a un escenariu foi con Xéliba en Nava. Alcuérdome que taben al soníu Musical Marcos -poco se fala de la xente del soníu, que son los que más trabayen, y con diferencia, nos conciertos- y tocaben Cambaral. Enantes y depués del conciertu doivos una pista: Nava. NA-VA.

¿Qué ye lo más inxusto de ser artista?

Na mio opinión -y esperiencia- lo peor ye la precariedá de los trabayadores culturales. La falta de profesionalización del sector onde la trampa ta a la orde del día -por pura necesidá, na mayoría de los casos-; y l’actitú que se tien pa los trabayadores, en munchos casos por parte de la xente que los contrata, ye munches veces, y por dicilo suave, ”condescendiente”. Ensin falar de la xente qu’ensin saber facer la “o con un canuto” lleven una vida entera viviendo del trabayu d’otros. Afortunadamente, muncho d’esto ta cambiando.

«Lo peor de ser artista ye la precariedá. La falta de profesionalización del sector onde la trampa ta a la orde del día y l’actitú que se tien pa los trabayadores, que munches veces ye condescendiente»

Si fueres Conseyera de Cultura, ¿qué son les primeres coses que fadríes?

Cónstame que delles de les cuestiones que m’esmolecen tán abordándose, anque de forma seliquino: una promoción real de la música asturiana y n’asturianu, un intentu de sofitar a los profesionales del sector y buscar la forma de poder normalizar la escena amateur pa que nun se convierta en competencia deslleal y les condiciones de trabayu seyan dignes y segures.

Per otru llau ta’l tema de la música nos chigres, que tien que llegalizase yá, precisamente polo que dicía enantes. Y una cosa que considero fundamental: les escueles de música tradicional. Ye necesario un sistema d’enseñanza de la nuesa música onde tean representaos tolos instrumentos que s’usen, adaptáu a les particularidaes de la música tradicional asturiana d’una forma realista y xusta pa toos. Agora mesmo hai una asimetría mui inxusta y que nun s’axusta a la realidá de la música’l país.

«Ye necesario un sistema d’enseñanza de la música tradicional onde tean representaos tolos instrumentos, adaptáu a les sos particularidaes d’una forma realista y xusta. Agora mesmo hai una asimetría que nun s’axusta a la realidá de la música’l país»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Hebo un Conciertu pola Oficialidá na Plaza Toros de Xixón nel añu 93. Convenciera a mio pá pa que nos llevara a un amigu del institutu y a min. Tábemos descubriendo la música tradicional reellaborada, folk, o como queráis llamalo, y aquel día marcóme tanto como pa definir la mio vida. Esa nueche taben Xéliba, colos qu’acabaría tocando. Dancé con Balandrán, que sacaren el primer discu esi añu -alcuérdome como si fora ayer de garrar el bus en Les Vegues pa dir a La Caraba, un chigre d’Avilés que más tarde convertiríase n’El Cafetón pa mercar esa cinta, que tovía conservo como oru en pañu-.

Pero’l momentu onde too petó foi cuando Jerónimo Granda presentó a Felpeyu y dixo dalgo del tipu: «y eso que toca esti ye un bouzouki que ye lo del sirtaki». Cuando sentí a Ígor tocar flipé y n’acabando’l conciertu corrí a falar con él y a pregunta-y milenta coses. Ellí desplicóme tolo que sabía del instrumentu, apuntóme nun papelín la dirección del constructor y dexóme tocar un poco p’acabar yo prendáu del too pol soníu d’esi cacharru. Esto foi muncho enantes del Internet, asina qu’esi tipu d’información de primer mano yera como si te tocara la lotería. L’arrogancia d’Ígor esa nueche marcóme pa siempre.

Depués vinieron les clases con Tina Cuadriello -que resulta que vivía a 200m d’au vivía yo-, Xéliba, y ser parte d’esa escena de finales de los 90 onde pa cuatro que yéremos, facíase piña d’una forma tremenda.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

La verdá ye que nun tengo prexuicios como pa sentime culpable pola música qu’escucho. Puedo dicivos que soi mui fan de la primer época de Juan Luis Guerra y qu’ABBA flípenme enforma. Últimamente tuve una época de sentir a La niña de los peines de forma compulsiva. Eso sí, si dalgún día digo que me presta José Manuel Soto o Bertín Osborne doivos permisu pa disparame.

¿A qué personaxe públicu convidaríes a un conciertu tuyu, a pasar llueu pel backstage y pa qué?

A cualesquiera persona que diga que col asturianu nun se llega a nengún llau. Con un poco suerte igual se da cuenta de la gran mentira que ye pensar eso.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Cualesquier de Xuan Bello. Anque hai munchos autores n’asturianu que m’abulten super musicales, con Bello voi faciendo música según lleo. Taría prestoso que se fixera realidá, ¿o qué?