Casete ‘Cróniques Urbanes’ de La Noche que Perdimos Cuba (1991)

El documentu sonoru qu’asoleyamos agora nel AMCA trátase d’una casete de La Noche que Perdimos Cuba, formación pop creada en 1985 que sacó un trabayu n’asturianu financiáu poles Ayudes a la Producción Fonográfica n’Asturianu qu’existieron nos primeros 90 y a les que s’acoyeron dellos grupos que cantaben en castellanu como primer opción.

Ente los años 1990 y 1992, la Conseyería d’Educación, Cultura y Deportes del Gobiernu d’Asturies entamaba una llinia d’ayudes a la producción discográfica en llingua asturiana, col aquel d’afalar a los y les creadores musicales a componer nella. Al traviés d’estes subvenciones patrocináronse una serie de discos y casetes de grupos estremaos, qu’optaron a elles pa poder ufiertar en formatu físicu una muestra del so llabor. Ente les formaciones beneficiaes habíales estables y yá con cierta trayectoria y otres creaes a costa fecha pa presentase a les convocatories d’estes ayudes. Ente elles figuren nomes como Fuera de Serie, Andecha, Los del Bar, UHP, The Mejores o Pálidos Pilotos.

Magar que la intención yera bona -promover la música n’asturianu-, la realidá foi que la esperiencia nun representó más allá d’una anécdota nel panorama musical del país y la so incidencia mínima. La inmensa mayoría de les bandes que s’acoyeron a esti plan cantaben en castellanu y traducíen les sos lletres pa poder entrar nun estudiu de grabación, cantándoles nel idioma orixinal nos sos conciertos. Sicasí, estes grabaciones son anguaño una pequeña rareza dientro de la música d’espresión asturiana, poro, ameriten un espaciu y atención nesti archivu.

Ún de los nomes que se presentaron a aquella llinia, denominada Ayuda a la Producción Fonográfica n’Asturianu, foi La Noche que Perdimos Cuba, proyectu personal del músicu llangreanu Fran Díaz creáu nel añu 1985. Depués de delles maquetes caseres, diba rexistrar al traviés d’estes subvenciones, una casete titulada Cróniques urbanes, publicada pola discográfica uviedina KM444 en 1991. Nella incluyíense nueve pieces de calter pop, mui na onda d’aquella dómina, nes que tanto na música como na lletra y nes interpretaciones -instrumentales y vocales- l’autor ye’l propiu Fran Díaz.

Guitarres eléctriques llimpies, baxu percutivu y caxa de ritmos, ufierten el sofitu sobre’l que trescurren les voces que cuenten histories cotidianes, con un puntu d’ironía y sarcasmu. La casete editábase ensin muncha más información y ensin los testos de los cantares, quedando como un exemplu del pop ochenteru llariegu. En 1997, yá como banda, La Noche que Perdimos Cuba llanzaríen un segundu y últimu trabayu de títulu Sudor y lágrimas (Vudú Records), con lletres en castellanu dafechu.

01. Pas, pas
02. Ruega por nosostros
03. Nena
04. Búscate la vida
05. El más llistu de la panda
06. Fantasma
07. Estrelles
08. Satán
09. Prima nicotina

// CALCA EQUÍ PA SENTIR EL CASETE DE CRÓNIQUES URBANES//