Nes próximes selmanes Candás, El Franco, Xixón y Villaviciosa van acoyer cuatro eventos imprescindibles cola gaita como protagonista. Esta selmana entama’l XXVII Festival de Bandes de Gaites Villa de Candás con cuatro díes de bandes de gaites, el tradicional concursu de pareyes de gaita y tambor, bandines y baille. N’acabando l’eventu candasín, dende’l llunes 29 al domingu 4, Xixón celebra’l XXIV Festival de Gaites Villa de Xixón. Dos díes enantes, esti sábadu 27, ye la XXVII edición de la Festa da Gaita n’El Franco. Amás, el domingu pasáu presentóse en Villaviciosa la programación y cartelu del XVII Festival Internacional de la Gaita maliayu, que va desendolcase ente’l 5 y 8 de setiembre.
La XXVII edición del Festival de Bandes de Gaites Villa de Candás entama mañana xueves 25 cola participación de la Bagad Cap Caval (Bretaña), la Banda Gaites Teixo-Manolo Quirós (Asturies), la BandaGaitesCandás -qu’organiza l’eventu-, la Bandina de la BandaGaitesCandás y la Banda de Gaitas Nova Fronteira (Galicia). Amás de los pasucáis y conciertos d’estes formaciones, destacando’l desfile de la Nueche de Gaites -vienres 26 a la medianueche- y el propiu conciertu central del festival nel Parque de Les Conserveres -sábadu 27 a les 23h-, toquen cuatro bandines nes nueches del vienres y sábadu: Los Gascones, La Garrapiella -vienres-; Bandina La Llume y Orquestina La Xarangana -sábadu 27-. El domingu 28 a les 13h va celebrase la novena edición del Concursu de Pareyes de gaita y tambor «Memorial Diego Alonso» na Plaza La Baragaña y, a les 20.30h, una Tarde de Baille cola música de Caparines, Escontra’l Raigañu y Pandereteros d’Anguañu. La programación completa pue consultase equí.
El sábadu 27, el área recreativa As Pedreiras en Valdepares (El Franco) va acoyer la XXVII Festa da Gaita, la Xornada de Gaiteiros Tradicionales del Occidente d’Asturies. Dempués d’una churrascada a la estaca y les actuaciones de los gaiteros y agrupaciones participantes, va haber un conciertu de Rubén Alba -19h-.
La Banda Gaites Villa de Xixón entama dende’l llunes 29 la 24 edición del so Festival de Gaites, coles actuaciones de formaciones asturianes, gallegues y aragoneses: B.G. Villa de Xixón, B.G. Castrillón, B.G. Xinzo de Limia, B.G. Airiños de Fede y B.G. de Boto Aragonesas. La programación complétenla dellos conciertos –Xaime Arias y Carlos Casado, Pandereteros d’Anguañu y Daniel Meré-, una charra sobre gaites antigües de Fonsu Les Regueres, el Conciertazu pal Baille del miércoles 31 a les 20h, actividaes pa la reciella y la Gala de pieslle na Plaza Mayor -sábadu 3 a les 21.30h-.
Adelantu del F.I.G. Villaviciosa 2024
Por último, ta anunciada tamién la XVII edición del Festival Internacional de la Gaita de Villaviciosa, un eventu imprescindible pa esti instrumentu tradicional y el folk. Villaviciosa va acoyer ente’l 5 y el 8 de setiembre delles charres y talleres, conciertos de grupos del país y internacionales, esposiciones, actuaciones de bandes de gaites y bandines, la VIII Nueche en Danza del F.I.G., clases maxistrales, pasucáis, un certamen d’asturianada, concursu de gaiteros y gaiteres, y un mercáu astesanu. La programación pue consultase equí.
Amás, la organización del festival entamó esta selmana una campaña de crowdfunding en Verkami col oxetivu d’algamar más financiación y puxu nesta nueva edición y, especialmente, na programación del Día d’Asturies. Les recompenses pueden algamase dende los 16€ a los 70€: totes y camisetes con diseñu de Nieves González, montera artesanal de Made By Kös y otros productos de merchandising del festival.
MERCAR DISCOS DE GAITA
Suscríbite a les nuestres novedaes
