A primeros de la década del 2000 el capitalismu medraba a escala mundial col procesu de la globalización. La respuesta social vieno dende l’altermundialismu y el movimientu antiglobalización, con fuertes movilizaciones que marcaron esa dómina. Yeren los tiempos del “Piensa globalmente, actúa llocalmente” y la música nun foi ayena a esti momentu. Nesi contestu, tuvieron sonadía munches formaciones qu’amestaben lletres comprometíes y distintos sones del mundu ensin perder de vista la identidá propia del territoriu onde se facía esa música. Fermin Muguruza, Massilia Sound System, Manu Chao, Joe Strummer, Lamatumbá, Zebda… son dalgunos exemplos que tuvieron puxu d’aquella.
Asturies tamién foi partícipe d’esti momentu y la música asturiana tuvo al mesmu nivel qu’otros sones de la so redolada gracies a un proyectu yá desapaecíu: Soncai System. Esti axuntó a una montonera músicos del país pa facer una mecigaya d’estilos ente los que s’alcontraba’l reggae, funk, jazz, rap, dub… 17 años dempués de la publicación del so primer discu, Clashturies (L’Aguañaz, 2007), falamos con Xune Elipe, cabezaleru del proyectu xunto a Sergio Rodríguez, pa facer alcordanza del álbum. Con él estrenamos la estaya de discu del mes; na que vamos dir analizando dalgunos de los trabayos discográficos más destacaos de la música asturiana y acompañándolos d’una ufierta na tienda online.
¿Cómo surdió’l proyectu de Soncai System?
Surdió porque tenía ganes d’esperimentar con otru tipu de soníos. Dixebra yera y ye una banda de rock claramente, con un soníu mui determináu y específicu, pero a min apetecíame facer dalgo que se llevaba tamién d’aquella: metese nel estudiu y esperimentar con otru tipu d’estilos. Yo tenía claro cuálos yeren; fundamentalmente reggae, funky, dub, raggamuffin… y quería que nos xuntáramos una serie de músicos mui distintos; xente que venía de grupos de jazz, de formaciones más funk o incluso pop-rock. Falándolo con Sergio Rodríguez de Tutu Estudios, que yera’l técnicu de soníu de Dixebra n’aquel momentu y el técnicu de los estudios, gustó-y un montón la idea y los dos fuimos pensando en xente que podía participar nel proyectu.
Desendolcámoslo diendo al estudiu, delles veces, mesmamente ensin siquiera tener nada claro qué se diba facer. Otres veces, la mayoría, lo que facíemos yera trabayar sobre bases mui cencielles que preparaba Sergio, unviábanosles, y sobre elles díbemos pensando arreglos. Pero too esto nun ye como agora, que per internet pues tener ensayos virtuales. D’aquella non, d’aquella caún pensábemos unes coses y lo que solíemos facer yera tar tol día nel estudiu y esperimentar. Tanto pa la parte instrumental como pa la vocal. Caún podía tener una idea, llegaba ellí, intentaba cantala y sobre esa depués veníen los demás y trabayábase o descartábase directamente. Foi un trabayu dirixíu por Sergio y por mí, pero en realidá mui de comuña, mui de trabayar en conxunto.
«Lo que solíemos facer yera tar tol día nel estudiu y esperimentar. Tanto pa la parte instrumental como pa la vocal. Foi un trabayu dirixíu por Sergio y por mí, pero en realidá tamién mui de trabayar en comuña»
Amás de Sergio Rodríguez y tú, participen otra montonera músicos de dellos estilos ¿Cuál foi’l criteriu a siguir pa escoyer a eses persones?
Fundamentalmente, que tuvieren una mentalidá musical mui abierta y que pensábemos que podíen encartiar perbién colo que queríemos. Pela parte más reggae participó xente como Vito Álvarez y Delfín Valdés. Pela parte más rap DJ Pimp, Navarro, Dark la Eme, Dani Stylo. Pela parte más funk jazz, Eladio Díaz, el nuestru saxu en Dixebra. Y pela parte más pop-rock, Miguel Herrero, que tocaba la batería y la trompeta. Tamién participó Javi Tejedor y lo más llamadero de la so participación ye que foi la primer vez que se salió del rollu folk coles melodíes que fizo cola curdión diatónica, que ye lo que fundamentalmente toca, porque nun hai gaita. Nun hai gaita porque decidimos conscientemente que nun queríemos tener gaita porque nun queríemos que la solombra del folk siguiera tando presente; queríemos otra cosa distinta dafechu. Lo que sí nos gustaba, porque amás son estilos que se presten a ello, ye’l timbre de la curdión, y Javi fizo unes melodíes que se separten del trabayu avezáu n’él dientro del folk.
A partir d’ehí, una serie de collaboradores que se fueron axuntando a nós, pero fundamentalmente la base yera esta. Depués tamién foi importante, por exemplu, el llabor de les lletres. Encargamos lletres a determinaos escritores que nos prestaben o bien xente que yá escribía como Nava o como Ruboh d’Unomasuno, que depués tornamos al asturiano.
La pallabra de too yo creo que yera intuición. Yera too mui intuitivo. Nun había ensayos previos, nun había eso de llegar y xuntanos enantes de metenos al estudiu. Non; directamente nel estudiu componíemos, arreglábemos, creábemos, iguábemos lletres, facíemos les voces, los coros… Porque Sergio mandaba les bases feches de manera electrónica, pero unes bases mui cencielles pa que caún y cauna depués pudiera aportar lo suyo. Digamos que Sergio lo que facía yera la cadarma, pero depués, tolo demás, yera too en comuña.
«Decidimos conscientemente que nun queríemos tener gaita porque nun queríemos que la solombra del folk siguiera tando presente;queríemos otra cosa distinta dafechu»
¿Cuánto tiempu tardastis en facelo?
Echemos tiempu, porque yá digo que la manera de trabayar tenía un puntu anárquicu, porque yo creo que nunca llegamos a coincidir toos y toes xuntos nel estudiu de grabación hasta l’últimu día en que quedemos ellí pa sentir la mezcla que ficiera Sergio. Podíes xuntate un día tres persones, otru cuatro, otru dos, otru ún namás.. y resulta que llegabes y, de lo último que tú sintieres nel estudiu cuando tú tuvisti, aquello remodelárase, remocicárase, camudárense coses; hubo xente que llegó y metió otra historia, quitaronse dalgunes… Entós, yera un procesu de creación continua y constante. Llevó tiempu, llevó bastante tiempu, porque amás nun foi un períodu de díes consecutivos. Trabayábemos -como nun había nenguna presión nin priesa por sacar aquello- mui al debalu y a la nuestra manera. Pero tardamos creo, que tres meses, cuatro, desque Sergio escomenzó a enviar les bases hasta que salió’l discu.
«Nun identifiques el discu con una época d’hai casique 20 años. Lo que ye’l conxuntu de les pieces parezme que sigue teniendo una contemporaneidá bultable; tanto la grabación, como los arreglos, como les lletres»
Asoleyastis el discu va 17 años, nun contestu nel qu’esti tipu de música tenía bastante puxu, con proyectos como’l de Fermin Muguruza, Massilia Sound System, Obrint Pas… ¿Cómo crees qu’afrontó’l discu el pasu de los años?
Yo creo que bien, yo creo que ye un discu nel que los arreglos nun los identifiques con una época d’hai casique 20 años. Lo que ye’l conxuntu de les pieces parezme que sigue teniendo una contemporaneidá bultable; tanto la grabación, como los arreglos, como les lletres. Quien tien la responsabilidá de ello, y hai que da-yla absolutamente, ye Sergio, Sergio Tutu. Él grabó, encargóse de les bases pregrabaes, de samplers del baxu… creo que’l soníu que tien esi discu, que tovía se puede sentir güei tranquilamente, ye gracies a Sergio. Yo creo qu’avieyó, la verdá, realmente bien.
«Nun podíemos perder la modernidá y la contemporaneidá, porque los gustos taben empezando a camudar ente la xente de ventipocos años qu’escuchaba eses músiques»
Acordies a esto último, la mocedá de 2007 años podía sentise bastante identificao colo que suena en Soncai System. Y vos, asturianizastis eses tendencies musicales, poniendo a la música n’asturianu al mesmu altor de lo que se taba faciendo n’otros contestos sonoros. Güei les tendencies de gustos musicales de la mocedá camudaron abondo y nun hai nengún referente asturianu de les músiques actuales que consume la xuventú. ¿Cómo valores esto?
Sí, a min llámame l’atención. D’aquella, ún de los motivos polos que cuando-y conté la historia a Sergio tamién-y prestó, yera efectivamente porque Dixebra yera un grupu típicu grupu de finales de los ochenta de punk-rock. Que foi evolucionando, pero teníemos un soníu mui específicu y pa una xente que sentía determináu tipu de música: el rock punk, el ska punk, etcétera. Pero d’aquella taba escomenzando esa otra tendencia marcada por Zebda, por Massilia Sound System, Fermín Muguruza, Manu Chao, Obrint Pas, o Pomada -que veníen trabayando nes Illes Balears-… Nun sé cómo llamala. Manu Chao definióla en su momentu como patchanka, porque yera un rollu más rock, pero que depués foi evolucionando hacia soníos más caribeños, con ritmos más baillables, con ritmos más machacones, onde’l rap mezclábase col raggamuffin, el reggae mezclábase col funky… Esi tipu de soníos que d’aquella taben escomenzando y que la mocedá, que taba viviendo esi procesu de cambiu nos gustos musicales, pues taba acoyendo. Aquello foi una de les coses que, cuando tuve la idea, foi la de, efectivamente, como comentes, tresportar la lllingua asturiana a eses sonoridaes. Yá sabíemos que se podía facer canción d’autor, que se podía facer folk, que se podía facer rock y que yá había grupos -Los Berrones, Skama, Avientu, etcétera-; pero había que dir un pasu más allá. Nun podíemos perder la modernidá, la contemporaneidá, porque los gustos taben empezando a camudar ente la xente de ventipocos años qu’escuchaba eses músiques.
Había que facer posible que la llingua asturiana tuviere ehí tamién presente. Con calidá. Caro, eso conllevó riesgos y conllevó acarretar coles circunstancies particulares que tien el mercáu de la música n’asturianu, y que munches veces asóciase la llingua asturiana a los soníos de la música tradicional. Mayormente sigue siendo asina n’Asturies. Anque se nos presente un envoltoriu como mui modernu, sigue siendo una base tradicional sobre la que se trabaya. Nosotros queríemos dalgo orixinal dafechu, nuevo, que nun tuviera nada que ver. Yera una premisa ideolóxica, que nun tenga nada que ver nin cola música tradicional, nin cola gaita, nin colos timbres tradicionales. Queríemos otra cosa dafechamente orixinal, yera lo que se pretendía.
Caro, nel contestu d’aquella yera muncho más fuerte tovía’l venceyamientu qu’había ente llingua asturiana y soníos tradicionales, más o menos folkis, evolucionaos o lo que seya. Eso comportaba’l que la xente d’esi mundu nun s’interesaba por propuestes como esta y que, pero otru llau, pa la xente que taba comenzando a esperimentar con esti tipu de soníos pero en castellano, yéremos como un rara avis. Yo volvía a tener la mesma sensación que cuando montemos Dixebra; que tábemos ente dos mundos y qu’esos mundos diben paralelos y nun había manera d’interconectalos.
Yo creo qu’agora hai falta d’esta contemporaneidá. Yo particularmente y sinceramente creo que cumplí’l mio papel d’aquella, pero tengo 61 tacos y quien lo tien que facer ye otra xente. Yo d’aquella yá llegué un poco tarde, porque llegué con trenta y pico, cuarenta. Esi tipu d’histories, esi tipu de cambios siempre m’interesaren, pero agora yo nun me veo faciendo trap o reggaeton, y muncho menos comentándo-ylo a Sergio porque puede mandame a onde tú y yo sabemos. Creo que tien que ser otra xente la que tome esi relevu.
Agora ye mui llamadero, pero paez qu’hai como una vuelta a los raigaños y una vuelta a lo más tradi y a que lo moderno seya revisitar lo trad. Pero realmente nun hai conceptos orixinales dafechu con esti tipu de soníos como’l trap, el reggaeton o la música urbana. Véolo bastante ermo y nun alcuentro la esplicación porque hai xente mui nuevo nel movimentu asturianista o de reivindicación llinguística. Hubo una renovación xeneracional, de lo qu’hai qu’allegrase tol mundu pero, per otru llau, siguen teniendo referentes tradicionales, por mui modernos que puedan paecer.
«Tengo 61 años y nun me veo faciendo trap o reggaeton. Creo que tien que ser otra xente la que tome esi relevu, porque agora paez qu’hai como una vuelta a lo más tradi y a que lo moderno seya revisitar lo trad, pero realmente nun hai conceptos orixinales dafechu con otros soníos contemporáneos»
N’aquel 2007, amás de Soncai System, tamién asoleyastis el discu Tutu07, primer referencia de la folktrónica asturiana. Foi un añu bastante fructíferu pa la música asturiana. ¿Veslo asina? Y, per otru llau, esi dinamismu y orixinalidá paez que se frenó. ¿Por qué?
Efectivamente, el primer discu de Soncai System y Tutu Estudiu 07 yeren como, digamos, la cara A y la cara B de lo mesmo que se pretendía. Per un llau yera los soníos más actuales, menos trad, pero fechos en llingua asturiana y, per otru llau, yeren los soníos folkis y tradicionales, pero contemporanizaos al traviés de la electrónica y de sintetizadores y d’otru tipu d’arreglos, que Sergio ye un espertu nello amás. Sí que foron dos discos que nel so momentu creo que foron realmente la vanguardia na música fecha n’Asturies, non namás na música asturiana, sinón en tola música fecha n’Asturies; tanto la que se facía n’asturianu como en castellanu, como n’inglés, como en cualquier otra llingua.
El camín de Sergio yo creo que tuvo rempuesta munchos años depués con Fruela 757, con Llevólu’l Sumiciu, con L.lercia… con Rodrigo Cuevas, mesmamente. Parezme que tuvo esi reflexu unos años depués. Soncai nun tuvo esi reflexu depués porque, como diximos enantes, nun hai agora xente faciendo trap o reggaeton o música urbana n’asturianu. Nun sé, yo veo que la llingua asturiana nunca tuvo tan bon momentu como agora, vese que yá ye una llingua mui ambiental en tolos niveles de la sociedá asturiana. Na música tamién, cada vez hai más histories en llingua asturiana, más normalidá, pero nun acabo d’entender cómo la xente que sal d’un institutu con 16 o 17 años, o llega a facultá con 20, y que yá tuvo clases d’asturianu y demás, nun se pon a ello. Yo nun sé si ye por falta de voluntá o porque piensen que nun tienen la solvencia pa ponese a ello, pero ye bona pena. Yo siempre digo que si nesti momentu’l mercáu musical va per otru llau -y la industria y lo que ye’l fechu musical-, pero si siguiera funcionando como funcionaba n’aquellos momentos, cuando los sellos discográficos teníen una razón de ser -güei prácticamente yá nun tienen una razón de ser-, probablemente taría garrando a determinada xente que m’interesara y que ficiera esti tipu d’histories. Como yá ficimos tamién unos años atrás, cuando pensemos que yera necesario qu’hubiera un rock n’asturianu o facer un discu como L’asturianu muévese, o como Rock ‘n’ Llingua. Esa voluntá d’avanzar llinguísticamente, de normalizar llinguísticamente l’asturianu, perdióse una migaya.
«Clashturies Tutu07 foron dos discos que nel so momentu creo supunxeron realmente la vanguardia dientro de tola música fecha n’Asturies, non namás la que se facía n’asturianu»
Namás pudimos ver una vegada en directo a Soncai System, cuando participastis nel Premiu al Meyor Cantar.
Sí, foi una espinina que tuvimos ehí espetada siempre. La verdá qu’aquella esperiencia foi mui prestosa. Nun ganamos, foi mui prestosa. Yo creo que yera, nun sé si decir que yera demasiao avanzao p’aquel momentu que nos dieren el premiu al Meyor Cantar, pero creo que yera la propuesta más renovadora, más actual, moderna y más normalizadora de toles que se presentaron. Presentámonos col tema «Soncai» y foi una esperiencia en directo, con unos musicazos amás. Taba DJ Pimp, taba Sergio al baxu, Vito, Delfo y yo -tres cantantes n’escena-… Foi una pena, xuntámonos p’aquello, la verdá que prestónos tocar en directo y tamién los ensayos -qu’ehí sí hubo ensayos previos-. ¿Pudieron valir para que’l grupu siguiera? Yera mui difícil. DJ Pimp yera n’aquel momentu yera campeón d’Europa de scratch, tenía un montón de bolos y compromisos. Sergio col estudiu, los demás con grupos paralelos toos… Yera difícil mantener una formación como aquella. Por eso nun cuayó en directo y porque amás surdió como un proyectu d’estudiu. Lo que pasa que siempre quedó esa cosina ehí de: «hostia, si esto lo tuviéremos llevao al directo, ¿qué pasaría?».
A los 5 años de Clashturies aportó Revoluson. Llueu, ¿en qué quedó’l proyectu?
Revoluson foi porque cinco años depués a Sergio y a mí volvió picanos el niqui. Sergio tenía ehí guardaes unes cuantes bases que nun utilizáremos nel anterior y foi un discu menos dixital y más orgánicu, porque había batería, percusiones… yá nun yera too electrónico. Yera un discu más llevable al directo, anque había tamién partes de scratch y de remezcles que ficimos; programaciones… pero yera un discu más ska-funk. Yo d’esi tengo’l recuerdu de que sí que se grabó más rápido, foi menos emocional -porque yá Sergio preparara más los arreglos-, y tengo un recuerdu como que foi too más visto y non visto aquel discu. Apetecíanos a Sergio y a mí volver a retomar el proyectu, había unes lletres mui guapes que queríemos sacar, pero’l discu recuérdolu como menos emotivo, nun sé cómo decite. Tenía tamién buenos temes, pero en xeneral nun sorprendió tanto como’l primero. El primeru tuvo incluso más repercusión fuera d’Asturies que n’Asturies. Mesmamente, hai un tema que ye «Tienes un fusil» que llegó a remezclar un DJ americanu de Nueva York que se puso en contactu con nosotros, un tipu que pinchaba nun club de reggae y gustó-y un montón el tema, y dimos-y permisu pa que lu remezclara. Con aquel primeru, llogramos que nun pequeñu club de reggae de Nueva York igual una nueche había xente ehí baillando un tema n’asturianu.
Depués el proyectu foi amorrentando. Nel segundu collaboró muncha más xente tovía que nel primeru y alcontrámonos con qu’unos yeren xente de ventitantos años que marcharon a trabayar fuera porque tuvieron que buscase la vida; otros montaron formaciones paraleles o siguieren coles suyes o dexaren la música… En fin, foi un poco una dispersión lo qu’hubo y ehí quedó.
«N’Asturies planteate montar un grupu estable como esti y salir alantre yera mui h.odíu n’aquel momentu. Pero dímonos el gustu de decir: «mirái, sabemos qu’esto nun va a tener futuru, pero que sepáis que se puede facer esto tamién n’asturianu»»
Lo que queda del recuerdu de Soncai System yo creo que foi un poco l’impactu d’aquel primer discu y la sensación de lo que pudo ser y nun foi. Pudimos aprovechar la fola que comentabes enantes y esi ambiente qu’había, sobre too, ambientes alternativos que buscaben dalgo distinto a lo del rock radical que n’aquel momentu yera lo qu’empezaba a decayer yá. Taben surdiendo toa esta serie de grupos nuevos tamién n’Euskal Herria y n’otros sitios como en Cataluña o Valencia había medios al serviciu de la música na llingua propia. N’Asturies planteate la idea de montar un grupu estable como esti y de salir alantre yera mui, mui h.odíu n’aquel momentu. Yera un poco danos el gustu y decir: «mirái, sabemos qu’esto nun va a tener futuru, pero que sepáis que se puede facer esto tamién n’asturianu».
A Clashturies los medios de comunicación d’equí dieron-y mui poca importancia -sacante los medios en llingua asturiana- pero creo que ye un discu que les xeneraciones nueves n’Asturies que tán faciendo música urbana o rap, trap, ragamuffin, reggaeton, etc, tendríen que descubrir.
Suscríbite a les nuestres novedaes
