El Festival Internacional de la Gaita vuelve a celebrase un añu más en Villaviciosa. Ente mañana y el domingu 8 de setiembre va poder esfrutase de conciertos, pasucáis, concursos, esposiciones, charres, talleres, mercáu y otres actividaes. Les bandes de gaites, la música tradicional y el folk van protagonizar cuatro xornaes nes que la música de raigañu va enllenar ocho ubicaciones de la llocalidá maliaya.
Les bandes de gaites participantes nesta edición son, amás de la BG Villaviciosa-El Gaitero, BG Saxum (Xixón), BG El Gumial (Ayer), BG LaKadarma (Piloña), BG «Vega de Espinareda» d’El Bierzo y BG Xarabal (Galicia). Les formaciones van facer dellos pasucáis y actuaciones peles cais y places de Villaviciosa dende mañana hasta’l sábadu, día nel que van concentrase na carpa del festival -Cai Víctor García de La Concha-. El domingu 8, les bandines tradicionales ocupen la carpa dende les 12h: Fran Allegre y Nel Villanueva, Los Llerones y la Bandina de la BG Villaviciosa-El Gaitero.
Mañana, xueves 5, Anxo Lorenzo Trío -dempués de la cancelación del dúu que’l gaiteru gallegu diba formar col irlandés Eoghan Neff- abre los conciertos del festival a les 21h nel Teatru Riera. Al día siguiente, vienres 6, el FIG celebra la so VIII Nueche en Danza a les 21.30h na carpa’l festival coles panderetes de Caparines, 6 Riales y el Grupu de Baille Tradicional San Félix de Candás. El sábadu 7 y domingu 8 va haber dos Nueches Folk, tamién na carpa, cola participación de grupos asturianos y d’otros países: el dúu astur-bretón de Sylvain Barou y Rubén Bada, la vuelta de Corquiéu, David Pasquet 3 (Bretaña), Aira da Pedra (El Bierzo) y La Tarrancha, que zarra los conciertos del Día d’Asturies.
Esposiciones, talleres, concursos
La esposición «Asturies n’otra dómina: la ropa» d’indumentaria y traxes tradicionales asturianos entamada pol Grupu de Baille Tradicional San Félix inaugura’l FIG a les 18h da mañana. Xurde Fernández, direutor del grupu baille, va facer una visita guiada‘l vienres a les 20h na Casa de los Hevia. Fonsu Les Regueres va dar la charra «Gaites con historia» a les 19.30h nel Atenéu Obreru. Amás, Sylvain Barou, Pelayo Fernández, David Pasquet y Estefanía Moro van impartir delles charres, talleres y clases maxistrales a lo llargo’l festival. A estes actividaes súmense tamién el XIV Concursu de Gaiteros y Gaiteres «Memorial José Huerta», que yá zarró’l plazu d’inscripción, y el V Certame de Canción Asturiana «Xavi Solares», que va cuntar coles voces d’Alicia Villanueva Megido, Isaac Sierra Longo, Luis Estrada Fernández, Rubén Barredo Sánchez, Jairo Pérez García y el gaiteru Valentín Fuente.
La programación completa puede consultase equí:
Suscríbite a les nuestres novedaes
