La pianista asturiana y collaboradora de Musicasturiana.com, Claudia González, va interpretar Raigañu el próximu 14 de xunu en L’Auditori, espaciu venceyáu a la Escola de Música Superior de Catalunya. Trátase d’un recital col que remata’l máster n’Enseñanzas Artísticas de Estudios Avanzados en Interpretación: Lied, canción española y catalana y que recueye un total de quince pieces n’asturianu, gallegu, euskera, catalán y castellanu de compositores de finales del sieglu XIX y primeros del XX.
«Seis Canciones» d’Eduard Toldrà (1895-1962); «El rossinyol» de Manuel García Morante (1937-); «Canticel» de Xavier Gols (1902-1938); «Gure basetxe» de Pablo Sorozábal (1897-1988); «Seis canciones vascas» de Fernando Remacha (1898-1984); «Durme» de Pilar Castillo (1845-1942); «Negra Sombra» de Juan Montes (1840-1899): y «Al pasar por el puertu» y «Torna la gocha» de Baldomero Fernández (1871-1934); son les obres qu’esta pianista profesional lluanquina va poner enriba l’escenariu acompañada de les voces de la estremeña Iris Miralles, la peruano-catalana Brenda Sara y l’andaluza-castellana Pilar Cuadrado.
«El máster suel centrase nel romanticismu alemán y dalgo de canción francesa, asina que m’apetecía salir de lo típico y por eso ocurrióseme facer un amiestu con llingües del Estáu, pero sobre manera coles que yo tuvi dalgún contactu en dalgún momentu de la mio vida», desplica González. D’esta manera escoyó’l títulu Raigañu porque «poner enriba l’escenariu toes estes canciones que tienen muncho que ver cola tradición y colo popular ye tamién una posición política». «Ye un programa que fala muncho de mí, pero fala tamién de tol mundu y de toes estes cultures», sorraya la pianista plantegando que «dalgunes d’estes canciones son melodíes tradicionales o populares de los sos territorios d’orixe. Otres non, pero toes texen una rede sonora de raigañu, identidá y memoria coleutiva que trespasa les llindes de les llingües nes que foron pensaes».
TFM sobre Baldomero Fernández
Esti recital supón el fin de los estudios de Claudia González xunto col Trabayu Fin de Máster que fizo centrándose na obra del pianista Baldomero Fernández: «analizo una colección d’asturianaes que tien manuscrites con arreglos al pianu que se llama De la tierrina, álbum de canciones asturianes y rellaciono esos manuscritos coles grabaciones que fizo con La Busdonga y con El Maragatu». En rematando estos dos trabayos, esta música -que tamién ye panderetera y toca davezu xunto a Eva Tejedor & Les Pandereteres- va finar estos estudios que complementen la so formación n’Enseñances Artístiques Superiores de Música na Especialidá d’Interpretación – Piano pol Conservatoriu Superior de Música d’Asturies.
Suscríbite a les nuestres novedaes
